Azamattyq qorǵaý polkovnigi Meiirjan Aimanovty Jambyl jurty sońǵy saparǵa shyǵaryp saldy, - dep habarlaidy "Ult aqparat" "Habar 24" telearnasyna silteme jasap.
Órt sóndirýshi áskeri qoimadaǵy qyzyl jalyndy aýyzdyqtaý kezinde oryn alǵan joiqyn jarylystan qaza tapqan bolatyn. Onyń artynda ata-anasy, 5 balasy men jary qaldy.
Telearna málimetinshe, polkovnik - Aimanovtar áýletiniń úlkeni. Tuńǵysh ul bolǵandyqtan ata-anasy da, baýyrlary da oǵan arqa súieitin. Ol da aǵaiyn men týysqa, dos pen baýyrǵa árdaiym qushaǵyn ashyp, kómegin aiamaityn. "Oryndalmaǵan armandary kóp edi. Tym erte ketti. Janymdy aitqyzbai uǵatyn qulynym edi" deidi etegi jasqa tolǵan anasy.
"Jetige qarai men onymen habarlastym. "Balam, jumysyń bitti me? Qaidasyń?" dep edim. "Mama, órt sóndirýge ketip baramyn" dedi. Ol jarylys bolatynyn bilgen de joq. Órtti sóndire bastaǵan kezde jarylǵan ǵoi. Balalardyń bári ushyp-ushyp ketti. Ol 1-2 balany qutqarypty. Ózi qaitadan qalǵan balalarǵa kirip ketipti. Sodan shyqpady ǵoi", - deidi Aimanovtyń anasy.
Meiirjan jaqynda ǵana 45 jasqa tolǵan edi. Ómir boiy órt sóndirý salasynda eńbek etip, polkovnik shenine deiin ósti. "Adaldyq pen ádildikti jany qalaityn. Álsizge qamqor, jalǵandyqqa jany qas bolatyn. Kishkentaiynan sportty serik etti", deidi synyptas dostary.
"Meiirjandy kishkentaiynan bilemiz, sol kezde boiynda qairattylyq, qaharmandyq, álsizderge jaqtasyp, qorǵap júretin edi. Tóbemizden jai túskendei bop otyr. Endi ómir súrip, bala-shaǵany ósirip, qyzyǵyn kóremin be degende qyrshynynan ketip otyr", - deidi synyptasy Elmira Izmaǵambetova.
