Foto: Polisia.kz
Jambyldyq politseiler qarýly qylmyskerdi ustaý barysynyń videosyn jariialady, - dep habarlaidy "Ult aqparat" Polisia.kz saityna silteme jasap.
19 aqpanda Sarysý aýdandyq Politsiia bóliminiń qyzmetkerleri jedel aqparatty júzege asyrý maqsatynda qarý saqtady degen kúdikpen Jańatas qalasynyń 26 jastaǵy turǵynyn anyqtaǵan.
Arnaiy jedel-izdestirý is-sharalaryn júrgizý barysynda kúdikti Mercedes-Benz avtokóliginen shyǵý týraly politsiia qyzmetkerleriniń zańdy talabyna baǵynbai qarsylyq kórsetip, qashpaq bolyp, nátijesinde kóshe boiynda turǵan kólikti soǵady. Sol mezette júrgizýshiniń aldyńǵy esigin ashyp, syrtqa shyǵarmaq bolǵan politsiia qyzmetkerin kóligimen birge joǵary jyldamdyqpen súirep alyp ketedi.
"Ony toqtatý maqsatynda politsiia qyzmetkerleri aldymen aýaǵa, odan soń kóliktiń dóńgelegine oq atqan soń avtokólik aialdamaǵa soǵylady. Soǵan qaramastan, kúdikti jáne kólikte birge bolǵan úsh tanysy (Jańatas qalasynyń 31, 29 jáne 26 jastaǵy turǵyndary) boi tasalamaq bolǵan, alaida politsiia qyzmetkerlerimen olardyń barlyǵy ustaldy", - delingen habarlamada.
Portal málimetinshe, kúdiktiniń kóliginen 12 kalibrli MR-153 tegis uńǵyly myltyǵy 4 dana oǵymen, 1 aýyzdy 410 kalibrli Saiga-410 tegis uńǵyly myltyǵy 13 oǵymen, 5,6 millimetr kalibrli Margolin tapanshasy 7 dana oǵymen, 1 dana oqqaǵar (bronejilet), 1 dana gazdy-dybysty granatasy jáne ashana pyshaǵy tárkilengen.
Odan bólek, onyń Jańatas qalasyndaǵy turǵylyqty mekenjaiy boiynsha tintý júrgizý barysynda pnevmatikalyq BORNER tapanshasy, 6 oq jáne mataǵa oralǵan erekshe iisi bar shóp tárizdi zat tabylǵan.
"Kúdikti meditsinalyq kýálandyrý qorytyndysyna sáikes, esirtki tutynǵany anyqtaldy. Derek boiynsha QR QK-niń 380-baby 1-bóligi ("Bilik ókiline qatysty qorqytý nemese kúsh kórsetý áreketteri"), QR QK 287-baby 3-bóligi ("Qarýdy, oq-dárilerdi, jarylǵysh zattardy jáne jarylys qurylǵylaryn zańsyz iemdený, berý, ótkizý, saqtaý, tasymaldaý nemese alyp júrý") boiynsha sotaldy tergep-tekserý amaldary bastaldy", - delingen habarlamada.
Sot-meditsinalyq jáne sot-ballistikalyq saraptamalary taǵaiyndaldy. Qazirgi ýaqytta kúdikti ýaqytsha ustaý izoliatoryna qamaýǵa alynǵan. Tergeý jalǵasyp jatyr.
