Jambyl oblys Baizaq aýdanyndaǵy tótenshe oqiǵa kezinde qaýipsiz jerge kóshirilgen turǵyndardyń keibiri der kezinde kórsetilgen kómek úshin alǵys aityp jatyr , dep habarlaidy QazAqparat.
«Osy júrgen balalardyń, qyzdardyń bárine rahmetimdi aitamyn. Eldi osy jerge ákep, kópshilikti jinap, aman-esen shyǵaryp salyp jatqandary úshin kóp rahmet. Eńbekterińniń jemisin kórińder. Qiyndyqta barlyq kómek kórsetti, aýqaty daiyn. Keshki saǵat ondarda alyp keldi. Tańǵa deiin jedel járdem qyzmeti de qan qysymymyzdy tekserip jatyr. Osylai kómek bergenderine óte rizamyn», - deidi Baizaq aýylynyń turǵyny Zýhra Berdieva.
Taǵy bir turǵyn Botamoinaq aýyldyq okrýginde evakýatsiialanǵan halyqtyń úi-múlkin kúzetken patrýl qyzmetine alǵys bildirdi.
«Men Botamoinaq aýyldyq okrýginiń turǵynymyn. Túndegi jaǵdaiǵa balianysty quqyq qorǵaý salasy, patrýldik qyzmet ókilderiniń arqasynda aýyldyń halqy evakýatsiialanyp, syrtqa shyqty. Aýyldan eshqandai shyǵyn bolǵan joq. Ondaiǵa jol berilgen joq. Myna jigitter túnimen patrýli bar, ishki ister qyzmetkerleri bar, aýyl-aýyldy aralap, bárin sabyrǵa shaqyryp, mindetterin atqaryp jatty. Aýyl qylmystan aman-esen. Moraderlik siiaqty jaittar bolǵan joq», - deidi okrýg turǵyny.
QR Tótenshe jaǵdailar ministrliginiń baspasóz qyzmeti taratqan resmi málimet boiynsha, oqiǵa oshaǵy sanalatyn Korolevka kentindegi áskeri qoimaǵa eń jaqyn ornalasqan 3 eldi mekende 1 myńnan astam adam turady. Olardyń 710-y oblys ortalyǵyna evakýatsiialanǵan.
Jambyl oblysynyń ákimi Berdibek Saparbaev evakýatsiialanǵan aýyl turǵyndary búgin úiine qaitarylatynyn aitqan edi.
Aita keteiik, 26 tamyz kúni saǵat 19:00-de Jambyl oblysynyń Baizaq aýdanynda ornalasqan áskeri bólim qoimalarynyń birinen órt shyǵyp, jarylys boldy.
