Jambyldyq politseiler joǵalyp ketken áieldi aýyr jaǵdaida tapty, - dep habarlaidy Polisia.kz.
Portal málimetinshe, Jambyl oblysy Sarysý aýdanynyń politsiia bólimine Saýdakent aýylynyń turǵyny 37 jastaǵy qaryndasynyń joǵalǵanyn aitqan. Áiel úiden belgisiz baǵytta ketip, jaqyndarymen bailanysqa shyqpaǵan. Ol 2011 jyldan bastap psihikalyq dispanser ortalyǵynda esepte turady.
Habarlamadan soń Sarysý aýdandyq politsiia bóliminiń jeke quramy shuǵyl túrde dabyl boiynsha kóterilip, joǵalǵan áieldi izdeýge jumyldyrylǵan.
"Izdeý jumysyna volonterler men jergilikti turǵyndar, aýdandyq tótenshe jaǵdai bóliminiń qyzmetkerleri de qosyldy. Áiel Sarysý aýdanynyń eldi mekenderinde ǵana emes, shekara mańyndaǵy aýyldardyń aýmaǵynda da izdeldi. Kósheler, úiler, aýlalar, qaraýsyz qalǵan ǵimarattar men jertóleler, joldyń boiy tekserildi.
Joǵalǵan áiel bes kúnnen keiin jazyq dalada aýyr jaǵdaida tabyldy. Esin bilgenmen, sýyq pen ashtyqtan ábden qajyp, áli quryǵan. Sol jerde oǵan meditsinalyq kómek kórsetildi", - delingen habarlamada.
"Quqyq qorǵaý organdarynyń qyzmetkerlerine, volonterlerge jáne turǵyndarǵa izdeý sharalaryna belsendi túrde qatysqany úshin alǵys aitqym keledi. Sarysý APB bastyǵy Ashat Almetov bastaǵan politsiia qyzmetkerleri kún-tún demei izdeý jumystaryn júrgizdi. Endi taba almaǵanymyzda meniń ápkem qaitys bolar edi. Tipti elestetýdiń ózi qorqynyshty", – dedi áieldiń aǵasy.
