Foto: Ashyq derekkózden
Jambyl oblysynyń Qordai aýdanynda sheneýnikter áleýmettik osal toptarǵa kommýnaldyq tólemin tóleý úshin bólingen qarjynyń 21 mln 600 myń teńgesin qaltasyna basqan, dep habarlaidy QazAqparat.
Sot úkimimen osy qylmysqa barǵan memlekettik qyzmetshiler 3 jyldan 7 jylǵa deiin bas bostandyǵynan aiyryldy.
«Qordai aýdany ákimdiginiń turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminiń basshysy 3 jyl 6 aiǵa, osy bólimniń sektor meńgerýshisi 7 jylǵa, maman - 3 jyl 6 aiǵa, taǵy da osy bólimde kelisimshartpen jumys istegen maman 7 jylǵa sottaldy. Sondai-aq bir kásipker sot úkimimen 3 jyl 6 aiǵa bas bostandyǵynan aiyryldy», - dedi Qordai aýdany prokýrorynyń orynbasary Qaisar Bekmuratov QazAqparat tilshisine.
Prokýrorlar tekserisi kórsetkendei, 2020 jylǵy pandemiia kezinde memlekettik biýdjetten 26 mln teńge bólingen.
Bul soma áleýmettik osal topqa jatatyn turǵyndardyń kommýnaldyq shyǵynyn óteýge baǵyttalǵan bolatyn.
Prokýratýra málimetinshe, Qordai aýdany ákimdiginiń turǵyn úi-kommýnaldyq sharýashylyq, jolaýshylar kóligi jáne avtomobil joldary bóliminiń basshysy, 3 qyzmetkeri jáne bir kásipker qylmystyq top quryp, aldyn ala sóz bailasý arqyly bólingen qarajatty talan-tarajǵa salǵan.
Osylaisha jergilikti turǵyndar úshin aýyr ýaqytta memleketten bólingen qarajat muqtaj azamattardyń qaltasyna jetpei jymqyrylǵan.
Atalǵan fakti boiynsha Qordai aýdany prokýratýrasy Qylmystyq kodekstiń 189-baby 4-bóligi 2-tarmaqshasy boiynsha sotqa deiingi tergeý júrgizdi.
«Nátijesinde aýdandyq sottyń úkimimen qylmyskerlerdiń kinási tolyq dáleldendi. Búgingi tańda memleketke 18,8 mln teńge qarajat qaitaryldy», - dep tolyqtyrdy aýdan prokýrorynyń orynbasary Qaisar Bekmuratov.
