Jambyl oblysynda esirtki saýdasymen ainalysqan uiymdasqan qylmystyq top ustaldy, - dep habarlaidy "Ult aqparat" Polisia.kz portalyna silteme jasap.
Jambyl oblysy PD Esirtki qylmysyna qarsy is-qimyl basqarmasynyń qyzmetkerleri ósimdik tektes esirtki quraldaryn (marihýana, gashish) daiyndaý, tasymaldaý jáne elimizdiń basqa óńirlerine ótkizýmen (biyl mamyrdan bastap) ainalysatyn Jambyl oblysy Shý aýdanynyń 5 turǵynynan turatyn qylmystyq topty quryqtady.
"14 qazanda jedel-izdestirý is-sharalary barysynda uiymdasqan qylmystyq toptyń barlyq qatysýshylaryn bir mezgilde ustaý júrgizilgen. Tintý júrgizý nátijesinde jalpy salmaǵy 100 keliden asatyn esirtki quraldarynyń (marihýana jáne gashish) iri partiiasy, sondai-aq Aqsý avtomaty jáne 5,45 mm kalibrli 30-dan asa patron tárkilendi.
Uiymdasqan qylmystyq top múshelerine qatysty QR QK-niń 297-baby 3-bóligi ("Esirtki quraldaryn, psihotroptyq zattardy, olardyń analogtaryn ótkizý maqsatynda zańsyz daiyndaý, qaita óńdeý, satyp alý, saqtaý, tasymaldaý, jóneltý ne ótkizý"), QR QK-nyń 296-baby 4-bóligi ("Esirtki quraldarymen, psihotroptyq zattarmen, olardyń analogtarymen zańsyz jumys isteý") jáne QR QK-nyń 287-baby ("Qarýdy, oq-dárilerdi, jarylǵysh zattar men jarylǵysh qurylǵylardy zańsyz satyp alý, berý, ótkizý, saqtaý, tasymaldaý nemese alyp júrý") boiynsha sotqa deiingi tergeý amaldary júrgizilip jatyr", - delingen habarlamada.
Qazirgi ýaqytta ustalǵandardyń barlyǵy QR QPK-niń 128-babyna sáikes ýaqytsha ustaý izoliatoryna qamalǵan.
Budan basqa, Jambyl oblysy Politsiia departamentiniń qyzmetkerleri biylǵy jyldyń 16 qazanynda oblys ortalyǵynyń aýmaǵynda Kalashnikov avtomaty, TOZ-63 qos uńǵyly ańshylyq myltyǵy, IJ-58 16 kalibrli qos uńǵyly myltyqtyń jáne 5.45 kalibrli 90-nan asa patronnyń kesindisi tárkilengen qarý-jaraq qoimasyn anyqtaǵan. Sot-ballistikalyq saraptama taǵaiyndaldy.
Jalpy, Jambyl oblysy PD qyzmetkerleri jyl basynan beri zańsyz ainalymnan 605 birlik atys qarýyn tárkilegen. Onyń 376-sy IIO-nan urlanǵan, al 229 birligi ózge de qylmystyq qarýǵa jatady.
