QR Mádeniet jáne sport ministri Aqtoty Raiymqulova biylǵy jyly qazaqtyń uly aqyny Jambyl Jabaevtyń 175 jyldyǵy Qazaqstanda qalai toilanyp jatqanyn aityp berdi, dep habarlaidy QazAqparat.
«Biyl Jambyl Jabaevtyń 175 jyldyǵyn atap ótip jatyrmyz. Bir jyl ishinde 500-den astam túrli is-shara ótkizdik, sonyń ishinde shetelde de. Aqyn shyǵarmashylyǵyn nasihattaýǵa baǵyttalǵan tanymdyq, mádeni, ǵylymi-ádebi keshter, taqyryptyq ekskýrsiialar, kitap kórmeleri men foto kórmeler, dóńgelek ústelder, aqyndar aitysy jáne basqa da is-sharalar ótkizilip jatyr», - dedi QR Mádeniet jáne sport ministri.
Sonymen qatar, ol búgin Jambyl Jabaevtyń 175 jyldyǵyn merekeleý aiasynda jas jazýshy, aqyn, óner qairatkerlerimen kezdesý ótkenin aitty.
«Mundai kezdesýler jas talanttarǵa úlken serpin beredi, olar elimizge kerek ekenin bilýi kerek. Bizdiń bolashaǵymyz - jastar. Osy is-sharalardyń barlyǵy solar úshin ótkizilip jatyr. Búgin túrli usynystar men bastamalar aityldy. Biz Táýelsizdiktiń 30 jyldyǵyn toilap jatyrmyz jáne ony baǵalai bilýimiz kerek. Óitkeni, bul kúndi ata- babalarymyz armandaǵan. Biz jumys istep, elimizdi damytýymyz kerek», - dedi Aqtoty Raiymqulova.
Aita keteiik, búgin Almaty oblysy Jambyl aýylynda ótken is-sharaǵa Memlekettik hatshy Q. Kósherbaev, Premer-ministrdiń orynbasary E. Toǵjanov, Mádeniet jáne sport ministri A. Raiymqulova jáne aqyn-jazýshylar qatysty.
