Foto: Úkimet
Memleket basshysynyń tapsyrmalaryn oryndaý sheńberinde Jambyl oblysynda sýmen jabdyqtaýdyń 12 jobasyn júzege asyrý Arnaýly memlekettik qor qarajaty esebinen qarjylandyrylady, dep habarlaidy Ult.kz.
Úkimet bul maqsattarǵa 15,4 mlrd teńge bóldi. Búgingi tańda 4 nysan paidalanýǵa berildi, qalǵan 8 nysandaǵy qurylys jumystaryn osy jyldyń sońyna deiin aiaqtaý josparlanýda.
Máselen, qazirdiń ózinde tórt eldi mekenniń turǵyndary sapaly aýyz sýmen qamtamasyz etilgen. Atap aitqanda, Jambyl aýdanynda Qyzylsharyq, Jańaótkel jáne Juma aýyldarynda jumystar aiaqtaldy. 300-den astam adam turatyn Talas aýdany Qaraoi aýylynda sý qubyry iske qosyldy. Buryn ol jerde ortalyqtandyrylǵan sýmen jabdyqtaý bolmaǵan. Jobanyń jalpy quny 933,4 mln teńgeni qurady, onyń 106,7 mln teńgesi tikelei Arnaýly memlekettik qordan bólindi.
Osy jyldyń sońyna deiin tapsyrý josparlanǵan 8 nysanda jumys jalǵasýda. Bul oblystyń shalǵai aýdandaryndaǵy jobalar. Máselen, Moiynqum aýdanynda Shyǵanaq, Myńaral jáne Qumózek stansalarynda, sondai-aq Moiynqum, Binazar jáne Birlik aýyldarynda jeliler rekonstrýktsiialanýda. Sarysý aýdanynda sý qubyryn rekonstrýktsiialaý Jaiylma jáne Maiatas aýyldaryn qamtidy, al Qordai aýdanynda Qarasai batyr aýylynda jeliler qurylysy júrip jatyr.
Óńirde sýmen qamtamasyz etý máselelerin sheshý júieli negizde júrgizilýde. Prezident tapsyrmasyna sáikes oblysta halyqty 100% aýyz sýmen qamtý mindeti júzege asyrylýda. 2025 jyldyń 10 aiynyń qorytyndysy boiynsha óńir qalalarynda qamtamasyz etý — 98%-dy, aýyldyq eldi mekenderde – 99,3%-dy quraidy. Jambyl oblysynda barlyǵy 23 sýmen jabdyqtaý jobasy júzege asyrylýda, onyń 13-i paidalanýǵa berildi.
Osyǵan uqsas jumys barlyq Qazaqstan boiynsha júrgizilýde. Elimizdiń eldi mekenderin tolyq qamtý úshin biyl respýblikalyq biýdjetten 257 jobany júzege asyrýǵa 105,7 mlrd teńge bólindi. Sýmen jabdyqtaý salasyndaǵy taǵy 229 jobany júzege asyrýǵa Arnaýly memlekettik qor qarajaty esebinen qosymsha 135,8 mlrd teńge bólindi.
