Jambyl oblysynda aýyl turǵyndarynyń tabysyn arttyrý týraly pilottyq jobada 11 aýyldaǵy kásipkerler sany 3 ese kóbeidi. Bul týraly QR Premer-Ministri Asqar Mamin aitty, dep habarlaidy "Ult aqparat".
Jalpy osy baǵdarlamaǵa 8 myńnan astam jeke jáne qosalqy sharýashylyqtar qatysqan.
«Halyqtyń jumyspen qamtylýy ósti jáne osy jobaǵa qatysatyn adamdardyń ortasha tabysy 2 esege artty. Al ataýly áleýmettik kómek alýshylar sany 3 ese azaidy. Oblystyń aýyl turǵyndarynyń tabysyn arttyrý tájiribesi óz tiimdiligin kórsetti jáne Memleket basshysy tarapynan qoldaý tapty. Bul jobany eldiń basqa óńirlerinde de qoldaný qajet», - dedi Asqar Mamin Úkimet otyrysynda.
Onyń aitýynsha, jobany basqa oblystarda iske asyrý úi irgesindegi jerlerdi paidalaný tiimdiligin, úidegi mal sharýashylyǵynyń ónimdiligin arttyrady, úlestik jer telimderin ońtaily paidalaný, kooperativterdi qajetti tehnikamen jabdyqtaý jáne aýyldaǵy biznes jobalardy qarjylandyrý qamtamasyz etiledi.
«Osyǵan orai Aýyl sharýashylyǵy ministrligine Eńbek, Ulttyq ekonomika, Qarjy ministrlikterimen jáne «Atameken» palatasymen birlesip, bir ai ishinde jobany basqa óńirlerde de keńinen qoldaný jónindegi jol kartasyn ázirleýdi tapsyramyn», - dedi Premer-Ministr.
Aita keteiik, Elbasynyń tapsyrmasymen 2019 jyly Jambyl oblysynda aýyl turǵyndarynyń tabysyn arttyrý úshin pilottyq joba bastalǵan edi.
Aýyl turǵyndarynyń tabysyn arttyrý jobasy 5 baǵytta júzege asty: birinshi baǵyt – úi irgesindegi jerlerdi paidalaný, ekinshi – mal basyn kóbeitý, úshinshi – aýyl syrtyndaǵy jerlerdi paidalaný, tórtinshi – tehnika berý, besinshi – kásip ashýǵa qoldaý kórsetý.
Sonyń nátijesinde 11 aýyldyń ózinde 45 myńnan astam mal satyp alyndy, 10 myń gektardan astam jer biriktirilip, kooperativ quryldy, 190 tehnika alynyp, óńdeý, jylyjailar sekildi 11 kásip ashyldy. Osy joba nátijesinde 2 282 kásipker resmi tirkeldi, 589 jańa jumys orny ashyldy.
