Jambyl oblysy T.Rysqulov aýdanynda jasyryn qoimadan toǵyz qap esirtki zaty tabyldy, dep habarlaidy "Ult aqparat".
Jambyl oblysynyń politsiia departamenti esirtki qylmysyna qarsy is-qimyl basqarmasynyń qyzmetkerleri «Qarasora-2020» jedel aldyn alý is-sharasyn ótkizdi.
Shara barysynda Turar Rysqulov aýdanynyń qumǵa jaqyn mańdaǵy aimaǵynda esirtkiniń jasyryn ornyn qazý kezinde Taraz qalasynyń 29 jáne 37 jastaǵy eki turǵynyn qolǵa túsirdi. Bul týraly oblystyq politsiia departamentiniń baspasóz qyzmeti habarlady.
«Jasyryn qoimada jalpy salmaǵy 68 keli 450 gramm «keptirilgen marihýana» salynǵan 9 polipropilen qap tabylyp, tárkilendi. Atalǵan derekke qatysty QR QK 297-baby 3-bóligi boiynsha sotqa deiingi tergeý amaldary júrgizilip jatyr» delingen vedomstvo habarlamasynda.
Kúdiktiler óz kinásin moiyndap, Turar Rysqulov APB ýaqytsha ustaý izoliatoryna qamaldy.
