Jambyl oblysynda ýchaskelik politsiia qyzmetkeriniń jáne onyń otbasynyń ómir súrý jaǵdailary qarastyrylǵan jańa ýchaskelik pýnkt salyndy, – dep habarlaidy Polisia.kz.
Ýchaskelik politsiia inspektorynyń standarty “politsiia qadamdyq qoljetimdilikte” qaǵidaty boiynsha qurylýy tiis, búgingi kúni bul – quqyq qorǵaý organdarynyń basty mindetteriniń biri, dep atap kórsetti Ishki ister ministri Erlan Turǵymbaev.
Ministr atap ótkendei, ýchaskelik inspektorlar halyqpen kúndelikti tikelei bailanysta, azamattarǵa oqys jaǵdaida birinshi bolyp kómekke kelip, qastarynan tabylady, olardy alańdatatyn máselelerdi biledi, sheshýge tyrysady, azamattardyń ómir sapasyn arttyrýda basty tulǵa sanalady. Ýchaskelik inspektorlar azamattardyń qaýipsizdigin qamtamasyz etý, qoǵamdyq tártipti saqtaý boiynsha belgili bir aýmaqtaǵy qylmysty boldyrmaý úshin kúrdeli jumystardy atqarady.
Máselen, Jambyl oblysynyń Baizaq aýdany Býryl aýyldyq okrýginde jergilikti atqarýshy organdardyń kúsh salýymen jańa ýchaskelik pýnkt salyndy, onda ýchaskelik politsiia qyzmetkeriniń jáne onyń otbasynyń ómir súrý jaǵdailary qarastyrylǵan. Osyndai jańa formattaǵy pýnkt Jambyl oblysynyń aýmaǵynda ázirge bireý, alaida, oblystyń PD basshylyǵy osy úrdisti jalǵastyrýdy josparlaýda.
Aita keterligi, turǵyn jai qajetti jihazben, tehnikamen, bailanys quraldarymen jáne beinebaqylaý júiesimen jabdyqtalǵan. Bul azamattarmen qarym-qatynas protsesi únemi baqylaýda ekenin bildiredi, sondai-aq sybailas jemqorlyq áreketterine de tosqaýyl bolady.
“Bul ákimshilik ýchaskege úsh jylǵa qyzmetke bekitildim. Jumys ońai emes, mindetime qoǵamdyq tártipti qorǵaý, bekitilgen ýchaskede qoǵamdyq qaýipsizdikti qamtamasyz etý, sondai-aq júgingen nemese shaǵymdanǵan jaǵdaida halyqqa ózge de kómek kórsetý kiredi. Kontingent ártúrli, árqaisysyna jeke kózqaras qajet, aita ketý kerek, aýmaqta 12 943 adam turady, onyń ishinde 72 adam IIO-da esepte. Qarýdy alyp júrýge jáne saqtaýǵa ruqsaty bar 57 azamat bar, olardyń QR zańnamasyn saqtaý jáne oryndaý sharttaryn qadaǵalaý qajet. Qazirgi ýaqytta aýmaqta 22 qylmys deregi tirkeldi, onyń 16-sy ashyldy, jumys jetkilikti. Ótken kezeń ishinde ǵana tynyshtyqty buzýdan, usaq buzaqylyqtan, jalpy paidalaný oryndarynyń lastanýynan, turmys salasyndaǵy quqyq buzýshylyqtardan bastap qylmystyq teris qylyqtarǵa deiin ártúrli sipattaǵy 130 ákimshilik quqyq buzýshylyqty anyqtadym”, – dep sózin túiindedi Baizaq aýdany Býryl okrýginiń ýchaskelik inspektory Aidyn Qorǵanbaev.
Ýchaskelik inspektordyń jumysy tolyq qaitarymdy talap etedi, túngi ýaqytta kóptegen qiyndyqtar týyndaidy, túrli shaqyrtýlar bolady. Sol sebepti de, inspektordyń áieli onyń jumysyna úlken túsinistikpen qaraidy.
Jambyl oblysynda 355 ýchaskelik politsiia inspektory jumys isteidi. Olar azamattardyń tynyshtyǵyn kúzetip, quqyqtary men múddelerin, sondai-aq quqyqqa qarsy qol suǵýshylyqtan qorǵaidy. Olardyń arasynda óz ómirlerin qaterge tigip, adamdardyń ómirin birneshe ret qutqaryp, qylmysqa qarsy kúreste jáne qylmystardy ashýda aitarlyqtai kómek kórsetkender de bar. Ýchaskelik ispektorlar qyzmetiniń tiimdiligin arttyrý jáne qyzmet atqarý jaǵdailaryn jaqsartý QR IIM men Jambyl oblysynyń Politsiia departamentiniń erekshe baqylaýynda tur.
