Senator Bekbolat Orynbekov Jambyl oblysynda sý tapshylyǵy máselesin sheshý úshin jańa sý qoimalaryn salý qajet dep otyr, dep habarlaidy QazAqparat tilshisi.
Depýtat bul taqyrypty el Premer-Ministriniń atyna joldaǵan depýtattyq saýalynda kóterdi.
Senatordyń aitýynsha, sýarý sýynyń jetispeýshiligine bailanysty transshekaralyq problemalar óńirdegi aýyl sharýashylyǵynyń damýyna, demek, eldiń azyq-túlik qaýipsizdigine keri áserin tigizýde.
«Jambyl óńirinde irrigatsiialyq maqsattar úshin paidalanylatyn sý resýrstarynyń 85 paiyzy Qyrǵyz Respýblikasynyń aýmaǵynda qalyptasady. Sol sebepti, vegetatsiia kezeńinde 1983 jyly qabyldanǵan «Transshekaralyq Shý jáne Talas ózenderi aǵyndylarynyń sýyn bólý týraly» kelisiminiń sharttaryna jáne onyń ekinshi tarappen oryndalýyna táýeldi bolyp keledi. Atalǵan kelisimge sáikes, óńirge Shý ózeniniń basseini boiynsha 370 mln tekshe metr jáne Talas ózeni boiynsha 590 mln tekshe metr sý tiesili. Degenmen, qyrǵyz tarapynyń bekitilgen kestelerdi saqtamaýyna bailanysty, Qazaqstan jyl saiyn Shý ózeninen 50 paiyzǵa deiin, Talas ózeninen 25 paiyzǵa deiin sýdy ala almaidy»,- dedi senator.
Biyl Shý jáne Talas ózenderi basseinderindegi qar qorynyń azdyǵynan tapshylyqtyń artýy múmkin ekeni jaǵdaidy qiyndatyp otyr.
«Barlyq sý qoimalarynyń tehnikalyq-ekonomikalyq negizdemelerine memlekettik saraptamanyń oń qorytyndysy alynyp, jobalyq-smetalyq qujattama ázirleýge qarajat bólý máselesi qarastyrylýda. Alaida, salalyq ministrlikpen tiisti ótinimder joldanǵanymen, búgingi kúnge deiin oń sheshimin tappai otyr. Sý qoimalaryn salý tek vegetatsiialyq kezeńde Qyrǵyz Respýblikasyna táýeldilikti azaityp qana qoimai, Jambyl oblysynyń Qordai, Merki, Baizaq, Jambyl jáne Talas aýdandarynda aýyl sharýashylyǵy daqyldarynyń ósýine úlken áserin beredi, sondai-aq, osy aýdandardyń turǵyndary arasyndaǵy áleýmettik shielenisti tómendetýge de kómektesedi»,- dedi depýtat.
Senator sonymen qatar, qurylys jumystary aiaqtalǵannan keiin, óndiristiń rentabeldiligi 30 paiyzdan asyp, jalpy ónimniń ósimi shamamen 17 mlrd teńgeni quraityndyǵyn jáne 3 myńǵa jýyq jumys orny ashylyp, halyqtyń ál-aýqaty jaqsarýy kútiletinin atap ótti.
