Jelide Jambyl oblysynda jalǵan tehpasport jasaýmen ainalysqandar ustaldy degen aqparatqa vedomstvo resmi jaýap berdi, - dep habarlaidy Tengrinews.kz.
"16 qarasha BAQ-ta jalǵan tehnikalyq pasporttar satqan MHQO qyzmetkeri týraly habar tarady. Memlekettik korporatsiia bul aqparatty rastamaidy. Ustalǵan azamattar Ahmetova I. jáne Qanatbai M. "Azamattarǵa arnalǵan úkimet" Memlekettik korporatsiiasy" KE AQ-tyń Jambyl oblysy boiynsha filial qyzmetkerleri emes.
Mán-jaidy anyqtaý barysynda Qanatbai M. ózin-ózi jumyspen qamtyǵan, jeke tulǵa aýmaǵynda keńse taýarlaryn satý, fotokóshirmeler jáne fotosýretterdi basyp shyǵarý boiynsha qyzmet kórsetetini anyqtaldy", - delingen habarlamada.
Vedomstvo málimetinshe, atalǵan tulǵalar óz qyzmetterin HQO-ǵa jaqyn jerde kórsetkendikten Jambyl oblysynyń Politsiia departamentiniń baspasóz qyzmeti ustalǵan adamdardyń jumys ornyna qatysty teris málimet bergen.
"Qazirgi tańda Shý aýdanyndaǵy Halyqqa qyzmet kórsetý bóliminiń barlyq qyzmetkeri shtattyq rejimde jumys isteidi, olardyń oqiǵaǵa qatysy joq", - dep tolyqtyrylǵan habarlamada.
Eske salaiyq, buǵan deiin Jambyl oblysynda jalǵan qujat daiyndaýmen ainalysqandar ustaldy degen habar taraǵan bolatyn.
Jambyl oblysy politsiia departamenti uiymdasqan qylmysqa qarsy kúres basqarmasynyń qyzmetkerleri jedel izdestirý is-sharalaryn júrgizý kezinde kólik quralyn tirkeýdiń jalǵan kýálikterin (tehnikalyq pasporttardy) daiyndaǵandardy ustady. Olar - Shý aýdany mamandandyrylǵan halyqqa qyzmet kórsetý ortalyǵynyń qyzmetkeri jáne onyń sybailasy - osy mekemeniń burynǵy qyzmetkeri.
