Foto: ashyq derekkóz
Jambyl oblysynda kámeletke tolmaǵan jasóspirimdi ózine-ózi qol jumsaýǵa deiin jetkizý faktisi boiynsha úsh tulǵaǵa qatysty sot úkimi shyqty, dep habarlaidy Ult.kz.
Qaiǵyly oqiǵa 2025 jyldyń sáýir aiynda Jambyl aýdanyna qarasty Tastóbe aýylynda bolǵan. 9-synyp oqýshysy óz úiiniń aýlasyndaǵy saraida asylyp, kóz jumǵan.
Atalǵan derek boiynsha Qylmystyq kodekstiń 105-baby 3-bóligimen (ózine-ózi óltirýge deiin jetkizý) sotqa deiingi tergep-tekserý júrgizilgen. Nátijesinde 22 jastaǵy aýyl turǵyny men 10–11 synyptyń eki oqýshysy kúdikti retinde tanylǵan.
Tergeý barysynda mektep oqýshylary arasynda «beiresmi kóshbasshylar» men «kóshelik uǵymdar» yqpaly qalyptasqany anyqtalǵan. Bul ortada qorqytý, psihologiialyq qysym kórsetý jáne eńbekke májbúrleý sekildi áreketter júieli túrde oryn alǵan.
Atap aitqanda, marqum jasóspirim qaiǵyly oqiǵaǵa deiingi kúnderi aýylda «avtoritet» sanalǵan azamattyń úiinde májbúrli túrde qurylys jumystaryn istegeni belgili boldy.
Qylmystyq is 2025 jylǵy 5 qyrkúiekte sotqa joldanyp, sot talqylaýy barysynda aiyptalýshylardyń kinási tolyq dáleldengen. Jambyl oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynyń 2026 jylǵy 16 sáýirdegi úkimimen olar kináli dep tanyldy.
Sot sheshimimen negizgi aiyptalýshy 8 jylǵa bas bostandyǵynan aiyryldy. Al kámeletke tolmaǵan eki sybailasyna árqaisysyna 5 jyldan jaza taǵaiyndaldy.
Úkim ázirge zańdy kúshine engen joq.
