Qańtar oqiǵalarynan keiingi «Quqyqtyq tártip» jedel aldyn alý sharasynda 4 myńnan astam qylmys ashyldy, dep habarlaidy QazAqparat.
Buǵan deiin QR Ishki ister ministrligi 19 qańtarda tótenshe jaǵdai rejimi joiylǵan soń, elimizdiń barlyq óńirlerinde «Quqyqtyq tártip» jedel aldyn alý sharasy ótetinin jariialaǵan edi.
Atalǵan sharany ótkizý kezeńinde 4 myńnan astam qylmys tirkelgen, onyń ishinde 300-den astamy qoǵamdyq orynda jáne 80-i kóshelerde jasalǵan.
«Ásirese eń kóp qylmys Shyǵys Qazaqstan, Almaty, Qaraǵandy oblystarynda, Almaty jáne Shymkent qalalarynda jasalǵan. 2 700-den astam qylmys «izin sýytpai» ashyldy»,- dedi QR Ákimshilik politsiia komitetiniń basqarma bastyǵy Baǵlanbek Aitpaev ministrlikte ótken brifingte.
Mysaly, spikerdiń aitýynsha, 19 qańtarda Aqtóbede politsiia qyzmetkerleri buryn sottalǵan eki azamatty «izin sýytpai» ustady.
Olar túnde meditsinalyq betperde kiip «Qazaq Oil» janarmai quiý stantsiiasyna baryp, janarmai quiýshy men kassirdi pyshaqpen jáne balǵamen qorqytqan jáne 100 myń teńgeden astam aqsha men uialy telefondy alyp ketken.
21 qańtarda ShQO Úrjar aýdany Baqty aýylynyń shetinde karabinmen jeke kásipkerdi atyp óltirgen turǵyn ustaldy.
Miinstrlik ókili habarlaǵandai, buryn jasalǵan 700-den astam qylmys, onyń ishinde aýyr jáne asa aýyr qylmystar da ashylǵan.
Izdeýde júrgen 107 qylmysker ustalǵan.
«Máselen, jappai tártipsizdikke qatysqan sondai-aq qyzmetkerler men áskeri qyzmetshilerge qarsy qylmys quraly bolǵan metall armatýra taratqan Almaty qalasy men Almaty oblysynyń alty turǵyny ustalyp, ýaqytsha ustaý izoliatoryna qamaldy. Nur-Sultanda memleketaralyq izdeýde júrgen Jambyl oblysynyń turǵyny, 5 qańtarda Jambyl oblysy Shý aýdany Tóle bi kentinde Nur Otan partiiasynyń ákimshilik ǵimaratyn órteýge qatysqan azamat ustaldy», - dedi Baǵlanbek Aitpaev.
