Sýret: Jambyl oblysynyń ákimdigi
7 shildede Jambyl oblysyndaǵy Sarysý aýdanynda qatty nóserden keiin kólbeý aǵyn qalyptasyp, taý bókterinde ornalasqan 200-den astam úidiń aýlasy men 21 úidiń ishin sý aldy, dep habarlaidy "Ult aqparat" Jambyl oblysynyń ákimdigine silteme jasap.
Oqiǵa ornyna oblys ákiminiń orynbasary Qanatbek Mádibek, tótenshe jaǵdailar departamentiniń bastyǵy Arman Toqanov, jolaýshylar kóligi jáne avtomobil joldary basqarmasynyń basshysy Murat Saýryqov kelgen.
Jergilikti atqarýshy organ jáne tótenshe jaǵdailar departamentinen jumyldyrylǵan 50-den astam adam turǵyndarǵa kómektesip, sý aidaý jumystaryn júrgizýde. Budan bólek, 17 birlik tehnika tartylyp, 11 motopompa qoldanylýda. Qajetti tehnikalar sanyn arttyrý úshin jedel sharalar qolǵa alynýda.
Qazir arnaiy tehnikalardyń kómegimen sýdy toqtatý, baǵytyn burý jumystary úzdiksiz atqarylýda.
Zardap shekken turǵyndar úshin qabyldaý pýnkteri daiyndyqqa keltirildi. Azamattardy tasymaldaýǵa arnaiy kólikter qarastyrylǵan.
Jalpy, tótenshe jaǵdai saldaryn joiý, qalypqa keltirý boiynsha naqty jumystar júrgizilýde.
Erbol Qarashókeev jedel shtab otyrysynda oryn alǵan jaǵdaidyń qaitalanbaýy úshin sebebin zerdeleý boiynsha jaýapty tulǵalarǵa naqty mindetter júktedi.
"Arnaiy komissiia qurylyp, turǵyndarǵa, zardap shekken nysandarǵa zań talaptaryna sáikes barlyq qajetti kómek, qoldaýlar kórsetiledi. Biz bul qiyndyqty da birge eńseremiz, – degen óńir basshysy atalǵan jaǵdai jeke baqylaýynda bolatynyn basa aitty", - dedi óńir basshysy.
Aita keteiik, aýdandaǵy ahýal turaqty, sý deńgeii tómendedi. Adam, mal shyǵyny joq.
