Jambyl oblysy Merki aýdanynyń Plodovoiagodnoe aýylyndaǵy jeke úide bes adam gazdan ýlanyp, ekeýi oqiǵa ornynda kóz jumdy, dep habarlaidy "Ult aqparat".
Zardap shekken 3 adam jedel túrde aýrýhanaǵa jetkizilip, tiisti meditsinalyq kómek kórsetilgen. Bul týraly «Óńirlik kommýnikatsiia qyzmetiniń alańynda» ótken brifingte oblystyq TJD bastyǵynyń mindetin atqarýshy,
polkovnik Maqsat Qosybaev málim etti. Ol óńirdegi turǵyn úi sektorynda órtterdiń jáne ýly gazben ýlaný jaǵdailarynyń aldyn alý jumystarynyń júrgizilýi,saqtyq sharalaryn ustaný barysy haqynda aitty.
Aldyn ala málimetter boiynsha, Merkidegi qaiǵyly oqiǵa tabiǵi gazdaǵy peshtiń tútindigin ornatý erejelerin saqtamaýdan bolǵan. Búgin oblys ákiminiń tapsyrmasymen oqiǵanyń mán-jaiyn anyqtaý úshin quramynda Jambyl oblysy TJ departamentiniń, Merki aýdany ákimdiginiń jáne gaz kommýnaldyq kásipornynyń ókilderi kiretin arnaiy komissiia quryldy.
«Atalǵan turǵyn úide úgit-profilaktikalyq jumys júrgizilgen. Biylǵy jyldyń 15 qyrkúieginde gaz jáne elektr aspaptaryn paidalaný kezinde turmysta órt qaýipsizdigi talaptaryn saqtaý týraly jadynama taratylǵan bolatyn. Aǵymdaǵy jyldyń 17 tamyzy men 17 qyrkúiegi aralyǵynda ótkizilgen turǵyn úi sektorynda órt qaýipsizdigi ailyǵyn ótkizý josparyna sáikes departament qyzmetkerleri «QazTransGazAimaq» AQ JPQ ókilderimen, volonterlermen, JPQ birlesip Merki aýdanynyń Plodovoiagodnoe aýylynda órttiń aldyn alý jáne halyqty órt qaýipsizdigi sharalaryna oqytý boiynsha úgit-nasihat jumystaryn júrgizdi»,- dedi oblystyq TJD bastyǵynyń mindetin atqarýshy , polkovnik Maqsat Qosybaev.
Jalpy, Jambyl oblysynda 1 qazanǵa deiin jaýapty mekeme tarapynan turǵyn úilerge profilaktikalyq jumys júrgizilgen. Nátijesinde 2167 úide 2863 órt qaýipsizdigi talaptarynyń buzýshylyqtary anyqtalyp, 743 úide kemshilikter tolyǵymen joiylǵan.
Qazirgi ýaqytta gazdan ýlanyp, jansaqtaý bólimine jatqyzylǵan 3 adamnyń bireýi palataǵa aýystyrylyp, ekinshisi oblystyq balalar aýrýhanasyna jetkizildi.
