Jambyl oblysy Qyzylorda óńirine 33 tonna shóp jóneltti. Igilikti is atalǵan óńirde qýańshylyq bolýyna bailanysty aimaqtyń belsendi azamattarynyń usynysymen qolǵa alyndy, - dep habarlaidy "Ult aqparat".
Osylaisha, Shý, Lýgovoi, Jańatas jáne Taraz qalasy temir jol stansalaryndaǵy vagondarǵa oblysymyzdyń barlyq aýdandarynan kelgen jońyshqa, pishen jáne tabiǵi shóp artylyp, Syr eline jol tartty.
Bul sharaǵa Baizaq aýdanyndaǵy Yntymaq aýyldyq okrýgine qarasty «Birlik» sharýa qojalyǵy da óz úlesterin qosyp, 300 baý jońyshqa bergen.
«Syn saǵatta birligimiz synalady, birge bolsaq – yntymaǵymyz nyǵaiady. Bizdiń búgingi jasap jatqan amalymyz ýaqyt ozdyrmai, qýańshylyqqa tap bolǵan aǵaiynǵa shópti erterek jetkizý», - deidi baizaqtyq «Birlik» sharýa qojalyǵynyń jetekshisi Rústem Aqylbekov.
Oblystyq aýyl sharýashylyǵy basqarmasynyń basshysy Qairat Amanovtyń aitýynsha, aimaqta qajetti iri sabaqty mal azyǵy qory jetkilikti.
«Búgingi tańda oblysymyzda mal azyǵyn daiyndaý jumystary jalǵasyn tabýda. Mal qystaýyn qalypty ótkizý úshin 1,7 million tonna pishen daiyndaý josparlanǵan. Búginde 1,5 million tonna pishen, 58 myń tonna pishendeme daiyndaldy. Alda súrlem daiyndaý naýqany tur. Jalpy oblysta mal azyǵyna qajetti iri sabaqty mal azyǵynyń qory qajet mólsherde jinaldy. Endi, mine, óńir sharýalarynyń usynysymen qýańshylyqtan zardap shekken Qyzylorda oblysynyń Aral qalasyna, Sekseýil kenti men Qamystybas aýyldyq okrýgindegi sharýalarǵa jem-shóp jetkiziletin bolady», - deidi ol.
Jambyl oblysynyń jurtshylyǵy qyzylordalyq aǵaiyndarǵa ári qarai da kómek kórsetetindigin jetkizdi.
