QR Aqparat jáne qoǵamdyq damý ministri Dáýren Abaev Parlament Senatynda qaralyp jatqan beibit jinalystar týraly zań jobasyna qatysty taǵy pikirin bildirdi, dep habarlaidy QazAqparat.
Aita ketsek, «Ashyq dialog» baǵdarlamasynda ministrge «Beibit jinalystar týraly zań jobasy halyqaralyq standarttarǵa áli de sai emestigi týraly adam quqyǵyn qorǵaý uiymdary syn aitýda. Buǵan qatysty ne aitar edińiz?» degen suraq qoiyldy.
«Eń aldymen, adam quqyǵyn qorǵaý uiymdarynyń bári de bul pozitsiiany ustap otyr dep aita almas edim. Iá, zań jobasyn júieli túrde synap kele jatqandary bar. Keide solar úshin bárin burynǵy qalypta qaldyryp, 1995 jylǵy zańmen ómir súre bergen yńǵaily bolar ma edi degen sezim de týyndaidy. Áitse de, zań jobasynyń progressivtiligin sanaly túrde shetteý – menińshe, burys strategiia. Sebebi zań daiyndaý – saýda isi emes. Biz Úkimet atynan ulttyq múdde, ulttyq qaýipsizdikti, el aýmaǵynyń tutastyǵyn saýdaǵa salyp otyrǵan joqpyz», - dep jaýap berdi ministr.
Dáýren Abaev óz sózinde quqyq mamandarynyń keibiri shetel azamattaryna mitingilerge qatysý quqyǵyn berý týraly usynys bildirip jatqanyn eske aldy.
«Álbette, bárin túsinip otyrmyz. Tipti, halyqaralyq statýttardyń da osyny talap etip otyrǵanynan habardarmyz. Degenmen, qazaqta «jaman úidi qonaǵy bileidi» degen jaqsy sóz bar. Biz árine, qonaǵyn qudaidai syilaǵan halyqpyz. Biraq qonaq qoidan jýas bolýy kerek», - dedi ol.
Ministr zańdy qabyldaý máselesinde qaýiptiń bárin, eldiń ereksheligin, aýmaqtyq jaǵdaiyn, halyqtyń saiasi mádenieti men qurylymyn, etnostyq quramy men dinin, konfessiiasyn eskerý kerektigin aityp ótti.
«Meniń oiymsha, sheteldikterge mitingke qatysý quqyǵyn berý – áli erte. Alaida osynaý jaǵdaida kóńilge kirbińdi basqa jai uialatady: osy áńgimelerdiń artynda zań jobasyna engizilgen óte mańyzdy jańashyldyqtar kórinbei qaldy. Eń bastysy – eskertý tártibi engizildi. Bul progress emes pe? Endi miting ótkizý úshin tek eskertý jazsańyz bolǵany. Eshqandai ruqsat alýdyń qajeti joq. Beibit jiyndardy ótkizýde prezýmptsiia qaǵidaty engizildi. Zańmen tikelei ótkizýge tyiym salynǵan jerden basqa piketterdi kez kelgen orynda ótkizý quqyǵy berildi. Eskertýdi berýdiń merzimi qysqartyldy. Mitingke qatysýshylardyń sany boiynsha shekteýlerdiń bári alynyp tastaldy. Sol sebepti zań jobasyna jalpy kózqaraspen qarap baǵa bergen abzal», - deidi Dáýren Abaev.
