Búgin Astanada Prezident Nursultan Nazarbaevtyń qatysýymen ótip jatqan telekópir barysynda Quryq portynyń paromdyq terminaly iske qosyldy, dep habarlaidy QazAqparat.
Qazaqstannyń tranzittik áleýetin damytý jáne Eýraziia qurlyǵyndaǵy logistikalyq torapty qurý jobasyn iske asyrý maqsatynda Memleket basshysy Nursultan Nazarbaev Quryq porty (Mańǵystaý oblysy) paromdyq terminalynyń birinshi kezeńin iske qosty.
«Qazaqstan temir joly» UK» AQ vitse-prezidenti Baýyrjan Orynbasarov Quryq porty Transkaspiilik kólik dáliziniń negizgi bóligi ekenine toqtala kele, 2017 jyly 1,2 mln tonna júkti ótkizý qamtamasyz etilgenin jetkizdi.
«Jańa avtomobildik-paromdyq keshen jyl saiyn qosymsha 2 mln tonna júkti qamtidy. Búgin biz Túrkiiaǵa jáne Eýropa elderine jańa baǵdarlardy iske qospaqpyz», - dedi B. Orynbasarov.
Óz kezeginde Elbasy bul jobalardy iske asyrý úlken jumysty qajet etetinin atap ótti. Osy oraida Quryq portynyń múmkindigi arqyly Qazaqstannyń eksporttyq áleýeti artatynyn jetkizdi.
«Sondyqtan osyndai uly jobalarǵa qatysyp jatqandaryńyz úshin quttyqtaimyz. Osyny iske qosqandaryńyz arqyly elge úlken jaqsylyq jasaisyńdar», - dedi Memleket basshysy.
.jpeg)