Tanymal qazaq jýrnalisi Sáýle Ábedinova kúni keshe jalǵyz ulynyń qyrqyn berip, quran baǵyshtady. Osyndai qasiretke dýshar bolyp, qaiǵydan qan jutqan ana Facebook paraqshasyna jazba qaldyryp, eldi jylatty.
“Meniń boiymda búginde eki Sáýle ómir súrip júr – balasy ólgenge deiingi Sáýle jáne balasy ólgennen keiingi Sáýle… Keide ózimdi aldarqatyp, túk bolmaǵandai, balasy ólgenge deiingi tórt qubylasy túgel Sáýleniń keipine enemin… Ondaida “úsh arsyz” meni bileidi…
Tipti, osy FB-ǵa kirip, posttardy, maqalalardy oqimyn, mýzyka tyńdaimyn, unaǵan dúnielerge barmaǵymdy basamyn, bólisemin… Unamaǵan nárselerge kúiip-pisip, boqtaimyn, “tóbelesemin”.
Iá… Bir qaraǵanda, sol baiaǵy ózderińiz biletin “aqyly az, emotsiiasyn tejei almaityn” Sáýlemin… Alaida… Moiyndaimyn… Men myń jerden burynǵy Sáýle bolyp kóringim kelse de, burynǵy Sáýle emespin… Ishimde bir ózek úzilip túsken, ishim ólip qalǵan Sáýlemin… Ómirge burynǵydan myń ese ashynǵan Sáýlemin…. Iá…Men qara jamylyp, balamdy joqtap aza tutqaly 41 kún…
Qulynymdy jer qoinyna tapsyrǵaly 40 kún…
Balapanym-aý, sýyqty unatpaýshy ediń ǵoi, tońǵaq ediń ǵoi… Qalai jatyrsyń mynadai aiazda qara jerdiń astynda? Qarańǵyny jek kórýshi ediń ǵoi… Qalai jatyrsyń tas qarańǵy qabirde?..
Ol sýyqty dál mendei jek kóretin…Ol ólgen kúnnen bastap, ómirdiń aiazyna tabiǵattyń aiazy qosylyp, janymdy da, tánimdi de qaryp ótti… Janym - dertti, júregim - muz… Jetsem degen armandaryna jete almady… Kórsem degen baqytymdy kóre almadym…
“Tym bolmasa túsime kirshi” dep jalynǵanyma 40 kún boldy… Túsime de kirmeidi… Ne durys uiqy joq…
“Taǵy tún….
Taǵy menen uiqy qashty,
Qaitemin qańyraǵan kúiki basty?!.
Aldymda mynaý fáni tyrjalańash,
Shyǵaryp tilin maǵan, siqyn ashty…”
Osynshama aýyr synaqty bergen Qudai sol synaqty kótere alatyn qýat ta beretin shyǵar. Abzalym… Abyzym-qobyzym… “Anashym” degen sózińdi saǵyndym… “Mamýlia, mamýsia, maze” degen sózderińdi saǵyndym… “Sáke” degen sózińdi saǵyndym…“Sáýkentai” degen sózińdi saǵyndym… Tym bolmasa túsime enshi, qulynym. 41 kún. Bara ǵoi, botam… Aq sútime yrzamyn… Alla aldyńnan jarylqasyn! Men, Anań, talbesikte terbettim… Jer-Anań jerbesikte terbetsin!…
***
Men ózgerdim… Endi bir kezdegi tórt qubylasy túgel Sáýle joq. Endigi Sáýle – basqa Sáýle. Burynǵydan júz ese aqymaq. Burynǵydan júz ese emotsionaldy. Ómirge burynǵydan júz ese qushtar, ómirdi burynǵydan júz ese súietin. Burynǵydan júz ese baqytty bolatyn Sáýle keldi. Sálemetsizder me! Qaiyrly tań, Sáýle! Ómirdi qaita bastaimyz ba??? Kettik!!!", - dep jazdy ol.
