Oljas Súleimenov em qabyldaýyna bailanysty Astanada nemeresiniń qazasyna bailanysty ótip jatqan sot otyrysyna qatysa almady. Bul týraly búgin sot otyrysynda jábirlenýshi taraptyń adkovaty Damir Sandinov oqyp bergen hatta aitylǵan, dep habarlaidy Sputnik Qazaqstan tilshisi.
Esil aýdanynyń ekinshi qalalyq sotynda ótip jatqan sot otyrysyna búgin marqumnyń ata-anasy da keldi. Al Eskendir Súleimenovtiń atasy Oljas Súleimenov em qabyldap jatqandyqtan, sotqa qatysa almady. Jábirlenýshi taraptyń qorǵaýshysy Damir Sandinov Oljas Súleimenovtiń hatyn oqyp, is materialdaryna qosýdy ótindi.
"Otbasynyń úlkeni retinde meniń de sot otyrysyna qatysýym kerek shyǵar. Biraq qatysa almaimyn. Em qabyldap jatyrmyn, onyń ústine sotta aitylatyndar men oqiǵa videolaryn kórý men úshin óte aýyr. Men áli kúnge deiin áleýmettik jelilerge kirgen joqpyn. Jelide taralǵan sumdyq kadrlardy eshqashan kórgim kelmeidi. Onyń ústine meniń sotqa qatysýym istiń aqiqatyn anyqtaýǵa eshqandai da kómektespeidi. Adam ólimimen aiaqtalǵan jol apaty bul árqashan da kisi óltirý ekeni praktikadan belgili. Tipti ádeii bolmasa da, mundai jaǵdaida jol erejesin buzý qylmys. Oqiǵanyń mán-jaiyn anyqtaý tergeý men sottyń isi. Eskendir endi qaityp kelmeidi, imandy bolsyn. Jalǵyz nemerem", —delingen hatta.
Oljas Súleimenov sot protsesiniń barysy men qorytyndysy jaqyndarynyń densaýlyǵyna teris áserin tigizbegenin qalaidy.
"Barlyǵy zań boiynsha ótetinine senemin", — degen ol.
Eske sala ketsek, qaiǵyly oqiǵa osy jyldyń 22 maýsymynda elordadaǵy kóshe qiylystarynyń birinde bolǵan edi. Qyzylorda IID bastyǵynyń qyzy Malika Muhitova solǵa burylý kezinde mototsiklshini qaǵyp ketken. Jas jigit oqiǵa ornynda jan tapsyrdy. Búgin Malika Muhitova marqumnyń ata-anasynan jylap keshirim surady.
