Jyl basynan beri ishki ister organdary jalǵan PTR-te jasaýdyń 39 jaǵdaiyn, vaktsinalaý pasportyn qoldan jasaýdyń 23 fatisin tirkegen, dep habarlaidy "Ult aqparat".
Ishki ister ministrliginiń baspasóz ókili Shuǵyla Turlybek vedomstvonyń aqparat alańynda osyndai málimet berdi.
«Jalǵan PTR-tester men vaktsinatsiia pasporttaryn qoldan jasaýshylardy, paidalanýshylardy anyqtaý baǵytyndaǵy jumystar belsendi júrip jatyr. Tergeý bólimsheleriniń óndirisinde PTR-testerdi qoldan jasaý, daiyndaý nemese ótkizý boiynsha Qylmystyq kodekstiń 385-babymen 42 qylmystyq is qozǵaldy. Onyń ishinde 39-y biyl tirkelgen. Vaktsinatsiia pasporttaryn qoldan jasaý boiynsha jyl basynan beri 23 qylmystyq is tirkeldi, tergeý jalǵasýda. Qoldan jasalǵan qujattardyń sany jáne árbir is boiynsha zańǵa qaishy áreket etkenderdiń sany da ártúrli. Olar tergeý qorytyndysy boiynsha naqtylanady», - dedi ministrlik ókili.
Onyń aitýynsha, Ishki ister organdar vaktsinatsiia pasporttary men PTR-testiń jalǵan anyqtamalaryn satý faktilerin anyqtaý úshin túrli jedel izdestirý is-sharalaryn áli jalǵastyra beredi.
«Politsiia qyzmetkerleri meditsinalyq ortalyqtardy, emhanalardy, vaktsina alý pýnkterin tekserýdi jalǵastyrýda. Ishki ister ministrligi jalǵan qujat jasaǵany úshin 4 jylǵa deiin bas bostandyǵynan aiyrý túrindegi qylmystyq jaýapkershilik, al ony paidalanǵany úshin 40 táýlikke deiin qamaýǵa alý kózdelgenin eske salady», - dedi Shuǵyl Turlybek.
