videodan alynǵan kadr
Qazaqstan musylmandary dini basqarmasy tóraǵasynyń orynbasary, naib-múfti Ershat Ońǵar jýrnalist Janat Baqyttyń áleýmettik jelilerdegi sózine qatysty málimdeme jasady, - dep habarlaidy Massaget.kz portaly QMDB baspasóz qyzmetine silteme jasap.
"Áleýmettik jelidegi Janat Baqyt degen jýrnalistiń Alla taǵala týraly aitqan aýyr sózderi musylmandar arasynda túsinispeýshilik týdyrdy. Osy oraida Qazaqstan musylmandary dini basqarmasyna ár óńirden túrli pikir, narazylyq bildirgen hattar kelip jatyr", - dedi Ershat Ońǵar.
Naib-múfti "jalpy shariǵatta Allanyń atynan jalǵan sóileý óte aýyr kúná" ekenin aitty.
"Mysaly, Alla taǵala qasietti Qurannyń Án'am súresiniń 144-aiatynda "Adamdardy nadandyqpen adastyrý úshin Allanyń atynan jalǵandy jalpaǵynan basatyn pendeden ótken zalym bar ma?" dep baiandaǵan. Alla saqtasyn, Qudai atynan jalǵan sóileýden aýyr is joq. Ásirese, Ramazan aiynda osyndai keleńsiz sózdi aitý men úshin de aýyr. Degenmen halyq tarapynan suraqtar jii qoiylyp, narazylyq bildirip jatqannan keiin múftiiat atynan resmi málimdeme jasaýǵa májbúr bolyp otyrmyz", - dedi ol.
Ol sonymen birge kópshilikti jýrnalistiń sózine ermeýge, el ishinde arandatýshylyq týdyrmaýǵa úndedi.
"Hakim Abai "Alla taǵala ólsheýsiz, bizdiń aqylymyz ólsheýli, ólsheýli menen ólsheýsizdi bilýge bolmaidy" dep aitady ǵoi. Osy rette barsha musylman qaýymyn jáne barsha otandasymyzdy jýrnalist Janat Baqyttyń sózine erip, dástúrli senimizge selkeý túsirip, el ishinde arandatýshylyq týdyrýdan saq bolýǵa shaqyramyz. Qasietti Ramazan aiynda mundai aýyr sózderdi aityp, el ishinde narazylyq týdyryp alýdan saq bolaiyq", - dedi ol.
Aita keteiik, jýrnalist Janat Baqyt buǵan deiin jelidegi paraqshalarynda "Allanyń missiiasy aiaqtalǵanyn, endi ony Jaratýshy dep aitý keregin jáne ony qabyldaý qajet ekenin" aitqan edi. Onyń bul málimdemeleri áleýmettik jelilerde qyzý talqylanyp, kópshilik teris pikir bildirip jatyr.
