QR QM Qarjy monitoringi komitetiniń Qostanai oblysy boiynsha ekonomikalyq tergeý departamenti Tobyl qalasy turǵynynyń óz kásiporny atynan jalǵan mámileler jasap, sol arqyly memleketke iri kólemde zalal keltirgenin anyqtady, dep habarlaidy "Ult aqparat" vedomstvonyń baspasóz qyzmetine silteme jasap.
Aiyptalýshy 2017 jyly óziniń firmasyn tirkep, Tobyl qalasynda keńse jaldaǵan. Klient izdeý kezinde ol jalǵan esep qujattaryn rásimdeýdi usynǵan tanysyna jolyǵady. Tiisinshe, tanysy qolma-qol aýdarylǵan qarajattan 3-5% kóleminde syiaqy usynǵan.
«Sol ýaqyttan bastap ol múliktik paida tabý maqsatyn iske asyrady. Tanysynyń JShS mekenjaiyna taýarlardy is júzinde jetkizbei, jumystardy oryndamai jáne qyzmetterdi kórsetpei, jalǵan býhgalterlik qujattardy rásimdep kelgen. Memleketke 195724161 teńge somasyna zalal keltirildi. Qostanai aýdandyq sotynyń úkimimen Tobyl qalasynyń turǵyny QR QK 216-baby, 3-bóligi., 28-baby, 5-bóligi., 245-baby, 3-bóligimen aiypty dep tanylyp, 5 jylǵa bas bostandyǵynan aiyryldy», - delingen baspasóz habarlamasynda.
Sondai-aq, ol 3 jylǵa memlekettik jáne kommertsiialyq uiymdarda, jergilikti ózin-ózi basqarý organdarynda uiymdastyrýshylyq-basqarý, býhgalterlik qyzmeterdi atqarý quqyǵynan aiyryldy.
