Turǵyndar arasynda taraityn jalǵan aqparat meditsina mamandarynyń negizgi jumystaryna aitarlyqtai kedergi keltiredi. Bul pikirdi Almaty oblystyq densaýlyq saqtaý basqarmasynyń jetekshisi Baýyrjan Ysqaq bildirdi, dep habarlaidy QazAqparat.
«Jalǵan aqparat dárigerlerdiń jumysyna aitarlyqtai kedergi keltiredi. Óitkeni el arasynda densaýlyq saqtaý salasyna qatysty qandai da bir áńgime shyqqan jaǵdaida, biz ony tekserip, onyń qaidan shyqqanyn anyqtap bilýimiz kerek. Óz kezeginde ol bizdiń osyǵan deiin atqarap tastaǵan jumysymyzdy qaita qarap, tekserýge májbúrleidi. Iaǵni biz mamandardyń basym bóligin osy jumysqa tartamyz da, dárigerler atqarýy tiis negizgi jumystar keiingi qalady. Biz basqasha áreket ete almaimyz, óitkeni biz taraǵan aqparattyń ras nemese jalǵan ekenin bilmeimiz. Al ony anyqtaýǵa óte kóp kóp ýaqyt ketedi. Sondyqtan men el azamattaryn tek tekserilgen resmi aqparattarǵa ǵana senýge shaqyramyn», - dedi B.Ysqaq.
Aita keteiik, jaqynda Almaty oblysy Jambyl aýdanyna qarasty Úmbetaly aýylynyń 31 jastaǵy turǵyny WhatsApp messendjeri arqyly Qainazar men Uzynaǵash aýyldarynda eki adamnyń koronavirýs juqtyrǵany týraly aqparat taratqan.
Atalǵan fakti QR QK 274 baby, 4 bóligi boiynsha (Tótenshe jaǵdai kezinde jalǵan aqparat taratý) sotqa deiingi óndiriske alyndy. Zańǵa sáikes, mundai jalǵan aqparat taratqan azamattyń 3-ten 7 jylǵa deiin bas bostandyǵyn shekteý nemese bas bostandyǵynan ajyratý sharasy qarastyrylǵan.
