Almatyda Memleket basshysynyń «Taza Qazaqstan» jalpyulttyq ekologiialyq bastamasy aiasynda uiymdastyrylǵan «Úzdik jasyl balabaqsha» jáne «Úzdik jasyl kolledj» qalalyq baiqaýlary jeńimpazdaryn marapattaý rásimi ótti, dep habarlaidy ult.kz.
Baiqaýdy Almaty qalasynyń Bilim basqarmasy uiymdastyrdy.
Baiqaýlar bilim berý uiymdarynda ekologiialyq mádenietti damytýǵa, balalar men jastardyń qorshaǵan ortaǵa jaýapkershilikpen qaraýyn qalyptastyrýǵa, sondai-aq kógaldandyrý jáne ekologiialyq tárbie salasyndaǵy praktikalyq bastamalardy qoldaýǵa baǵyttalǵan.
«Úzdik jasyl balabaqsha» baiqaýyna Almaty qalasynyń mektepke deiingi uiymdary qatysty. Aýdandyq kezeńde bilim berý uiymdary jobalaryn tanystyryp, úzdik bastamalar qalalyq kezeńge joldama aldy.
Baiqaý jumystaryn baǵalaý kezinde aýmaqty kógaldandyrý deńgeii, tárbielenýshilerdiń qatysýymen ekologiialyq jobalardy júzege asyrý, sondai-aq usynylǵan bastamalardyń praktikalyq mańyzy eskerildi.
Baiqaý qorytyndysy boiynsha júldeli oryndar bylai bólindi:
- I oryn — Alataý aýdanyndaǵy №31 bóbekjai-balabaqsha;
- II oryn — Áýezov aýdanyndaǵy №186 bóbekjai-balabaqsha;
- III oryn — Medeý aýdanyndaǵy №125 bóbekjai-balabaqsha.
Qalalyq mektepke deiingi resýrstyq ortalyqtyń basshysy Natalia Karasevanyń aitýynsha, «Úzdik jasyl balabaqsha» baiqaýy Almatyda alǵash ret ótkizilip, ekologiialyq tárbie salasyndaǵy praktikalyq tájiribe almasý alańyna ainaldy.
«Baǵalaý talaptary kóp boldy. Olardyń qatarynda balabaqshalardyń landshaftyq dizainy da, balalarmen júrgiziletin ekologiialyq tárbie baǵytyndaǵy jobalyq jumystar da bar», — dedi Natalia Karaseva.
Baiqaý jeńimpazdarynyń biri №31 bóbekjai-balabaqsha. Munda «Jasyl balabaqsha» baǵdarlamasy júzege asyrylyp keledi. Ekologiialyq bastamalarǵa tárbielenýshilermen qatar olardyń ata-analary da belsendi qatysady.
Baǵdarlama aiasynda balalar qaldyqtardy bólek jinaý qaǵidalarymen tanysyp, sý men elektr energiiasyn únemdi paidalanýdy, ósimdikterdi kútip-baptaýdy jáne jylyjailarda kókónis daqyldaryn ósirýdi úirenedi.
«Balalar alǵashqy kúnnen bastap ekologiia jáne qorshaǵan ortany qorǵaý baǵytyndaǵy jobalarmen jumys isteidi. Olar qoqysty suryptaýdy úirenedi, al qaita paidalanýǵa bolatyn zattardy arnaiy sheberhanalarda qoldanamyz», — dedi №31 bóbekjai-balabaqshanyń meńgerýshisi Ainur Bahtieva.
Ekologiialyq tárbieniń praktikalyq bóligi baqsha men jylyjailardy sýarý úshin tamshylatyp sýarý júiesin paidalanýdy qamtidy. Organikalyq qaldyqtar organikalyq tyńaitqyshqa ainaldyrylady. Sonymen qatar balabaqsha aýmaǵynda jaryqtandyrýǵa paidalanylatyn kún panelderi ornatylǵan.
Almatyda alǵash ret tehnikalyq jáne kásiptik bilim berý uiymdarynyń basyn qosqan «Úzdik jasyl kolledj» qalalyq baiqaýy da ótkizildi.
Baiqaý qorytyndysy boiynsha:
- I oryn — Almaty qazaq gýmanitarlyq-pedagogikalyq kolledji №1;
- II oryn — Almaty qurylys-tehnikalyq kolledji;
- III oryn — Almaty telekommýnikatsiia jáne mashina jasaý kolledji.
Almaty qazaq gýmanitarlyq-pedagogikalyq kolledji №1-de baiqaý aiasynda «Eko-kampýs», «Jasyl keńistik» jáne «Ekologiialyq mádeniet» jobalary júzege asyryldy. Stýdentter men oqytýshylar aýmaqty kógaldandyrýǵa, aǵash egýge jáne «Ustazdar alleiasyn» qurýǵa atsalysty. Ekologiialyq bastamaǵa kolledj túlekteri de qosyldy.
Eki qalalyq baiqaýdyń jeńimpazdary men júldegerleri Almaty qalasy Bilim basqarmasynyń diplomdarymen marapattaldy.
