Jalaqysy saqtalmaityn demalysqa jiberilgen qazaqstandyqtarǵa Memlekettik áleýmettik saqtandyrý qorynan tólemder taǵaiyndaý bastaldy, dep habarlaidy "Ult aqparat" QR Eńbek jáne áleýmettik qorǵaý ministrliginiń baspasóz qyzmetine silteme jasap.
Memlekettik áleýmettik saqtandyrý qory (MÁSQ) TJ kezeńinde eńbekaqysy saqtalmaityn májbúrli eńbek demalysyna ketýine bailanysty tabysynan aiyrylǵan jumys isteitin azamattarǵa jańa áleýmettik tólemderdiń alǵashqy taǵaiyndaýyn jasady.
Bir adamǵa shaqqandaǵy mólsheri aiyna 42,5 myń teńgeni quraityn áleýmettik tólemdi (eń tómengi jalaqy) Almatynyń eki turǵyny aldy.
Esterińizge sala keteiik, MÁSQ-tan jańa tólem Qazaqstan aýmaǵynda eńbek qyzmetin júzege asyratyn QR azamattaryna kelesi sharttarǵa sáikes beriletin bolady:
- áleýmettik tólem tótenshe jaǵdai jariialanýyna bailanysty jalaqysy saqtalmaityn demalysqa jiberilgen (jumystan bosatylmaǵan) qyzmetkerlerge júzege asyrylady;
- tólem alý úshin qyzmetkerlerge (jeke kásipkerler jáne jeke praktikamen ainalysatyn adamdar ózi úshin) tótenshe jaǵdai engizilgenge deiin sońǵy 12 aida MÁSQ-qa kem degende 3 ai boiy jarna aýdarýy qajet;
- áleýmettik tólem shaǵyn, orta jáne mikrobiznes qyzmetkerlerine; jeke kásipkerlerge (budan ári – JK); jeke praktikamen ainalysatyn adamdarǵa (notariýs, jeke sot oryndaýshysy, advokat, kásibi mediator); BJT tóleýshilerine qoldanylady.
Jańa áleýmettik tólemderdi taǵaiyndaý úshin jumys berýshiler (JK, jeke praktikamen ainalysatyn adamdar jáne BJT tóleýshiler óz betinshe júginedi) «Elektrondyq úkimet» veb-portalynda «Elektrondyq ótinish» servisi arqyly jumyspen qamtý máseleleri jónindegi jergilikti organǵa TJ kezeńinde qyzmettiń shektelýine bailanysty olardyń qyzmetkerleriniń kirisiniń joǵalýyn rastaityn qujattardy, qyzmetkerlerdiń tizimin jáne qyzmetkerlerdiń jalaqysy saqtalmaityn demalys berý týraly buiryqtan úzindi kóshirmeni qosa bere otyryp ótinish berýi qajet.
Jumys berýshilerdiń (JK jáne basqa sanattaǵy) ótinimderi negizinde halyqty jumyspen qamtý máseleleri jónindegi aýdandyq (qalalyq) shtab áleýmettik qoldaý kórsetý týraly sheshim qabyldaidy, al «Azamattarǵa arnalǵan úkimet» memlekettik korporatsiiasynyń bólimsheleri MÁSQ tólem jasaityn qyzmetkerlerdiń tizimin derbes qalyptastyrady.
Áleýmettik tólem qyzmetkerge jalaqysy saqtalmaityn eńbek demalysy kezinde, biraq tótenshe jaǵdaidyń uzaqtyǵynan aspaityn merzimde tólenedi.
