Eńbek jáne halyqty áleýmettik qorǵaý vitse-ministri Svetlana Jaqypova otbasynyń jiyntyq tabysyn eseptegen kezde jeke sharýashylyqty esepke alý máselesine qatysty túsinikteme berdi, dep habarlaidy Sputnik Qazaqstan tilshisi.
"Sharýashylyqqa qatysty saýaldar jii qoiylady. Negizi ataýly áleýmettik kómek týraly zańnyń 7-babynda jergilikti atqarýshy organdar jeke sharýashylyqty kiris dep sanaý-sanamaýdy ózderi sheshetini kórsetilgen. Olardyń sondai quqyǵy bar", - dedi Jaqypova májilis kýlýarynda.
Ol qazirgi tańda respýblikada tek bir ǵana oblys qoradaǵy tórt túlikti esepke almaitynyn atap ótti. Alaida onyń qandai óńir ekenin naqtylamady.
"Aldaǵy ýaqytta bul máselelerdiń barlyǵy qaitadan qaralyp, negizgi sheshimder qabyldanady. Jumys júrgizilip jatyr", - dep sendirdi Jaqypova.
Qoradaǵy maldy otbasynyń kirisi dep esepteý qanshalyqty durys degen saýalǵa ministrdiń orynbasary siyr ustaityn eki kórshini mysal etip, jaýap berdi.
"Máselen, eki kórshini alaiyq. Bireýi 20 siyr ustaidy, balalaryna etin jegizip, sútin ishkizip asyrap otyr. Al qasyndaǵy kórshisi siyrlary joq, ony satyp alýǵa jaǵdaiy da joq. Biraq járdemaqy taǵaiyndaǵan kezde, ekeýi de sol kómekke iligedi. Birneshe siyr ustaityn otbasy da balalaryna 21 myń teńge alady, birde-bir siyry joq kórshisi de dál sondai járdemaqy alady. Sonda aityńyzshy, osy ádiletti me?", - dedi vitse-ministr.
