Keshegi «qańtar qasireti» oilamaǵan jerden boldy. Halyqty kóshege shyǵýǵa májbúr etken - sananyń oianýy men eskishe ómir súre almaitynyn túsiný. Alaida beibit bastalǵan mitingtiń sońy tártipsizdikke, búlikke ulasty. Halyq kimniń arandatýshy, kimniń beibit turǵyn ekenin túsinbei qaldy. Mundaida el basqaryp otyrǵan Prezident naqty bailam jasap, shuǵyl sheshim qabyldamasa maqsatsyz, josparsyz eldiń arandap qalýy ábden múmkin. Memleket basshysynyń sol syndarly sátte qabyldaǵan sheshimi negizinen eldegi tynyshtyqty qalpyna keltirip, halyqtyń qaýipsizdigin saqtaýǵa, memlekettiń tutastyǵyn qorǵaýǵa baǵyttalǵanyn baǵamdaý qiyn emes.
"Azamat jetim bolmaidy - halyqtan bolsa panasy, halyq jetim bolmaidy - basshy bolsa danasy" deidi dara tulǵa Syrym Datuly. Sol aitpaqshy, Qasym-Jomart Toqaevtyń halyqpen birge ekenin, halyqtyń múddesi úshin jumys isteitinin Parlament Májilisinde sóilegen sózinen de ańǵardyq. Osy jiynda Memleket basshysy halyqtyń qarsylyǵyn týdyrǵan, renishin oiatqan máselelerdiń bárin qamtyp, bul túitkilderdi sheshýge nazar aýdaratynyn aitty. Onda 2025 jylǵa deiin iske asyrylatyn áleýmettik, ekonomikalyq jáne taǵy basqa baǵdarlamalardy atap, ony júzege asyrý jolyn kórsetti. Bul Memleket basshysynyń oilaý deńgeiin, bilimin kórsetip, úlken úmit arttyrdy.
«Jańa Qazaqstanǵa» ótý, árine, ońai nárse emes. Úkimet otstavkaǵa ketip, bilikke jańa adamdar kelip jatyr. Ózgerý úshin ýaqyt kerek, sabyrlyq kerek. Bul jerde eń bastysy halyqtyń aýyzbirligi, Prezidentti qoldaýy mańyzdy. Aitqanyna senýi oryndy. Óitkeni ol tek Prezidentke ǵana emes, bárimizge bailanysty. Árkim qolynan kelgenshe oń ózgeriske óz úlesin qosýy tiis. Endi bizge kemshilikti terip, qazbalap aita bergennen eshteńe shyqpaidy. Tyǵyraqtan shyǵar joldy el bolyp, Prezident bolyp birge izdep, oǵan bárimiz atsalysqan jaǵdaida ǵana Qazaqstandy jańasha qurýǵa múmkindik týady.
40 jylǵa jýyq ýaqyttan beri joǵary oqý ornynda oqytýshylyq qyzmet atqaryp júrmin ǵoi. Jastardyń bilimi de, mádenieti de, otanshyldyq sana-sezimi de eshkimnen kem emes. Endi biz jastarǵa kóbirek kóńil bólip, ózderin kórsetýine múmkindik jasaýymyz qajet. «Bolashaq» baǵdarlamasy boiynsha AQSh, Eýropa men Aziianyń eń aldyńǵy qatardy joǵary oqý oryndarynda bilim alyp kep jatqandary kóp. Bul da úlken jetistik. Meniń oiymsha endi olardy jan-jaqqa shashyratpai, shetelde alǵan bilim men tájiribesin el igiligine tiimdi paidalansaq, az ýaqyttyń ishinde úlken jetistikke jete alamyz.
Árine «Jańa Qazaqstandy» qurý úshin elge biraz ózgerister kerek. Bul úshin birinshi saiasi reforma qajet. Ekinshi, kúshti ulttyq ideologiiany qalyptastyrý kerek. Ol - eldiń ekonomikasyn, áleýmettik, materialdyq bailyǵyn kóterý. Halyqtyń jaǵdaiyn jaqsartý. Prezidenttiń jastarǵa senim artyp jatqanyn óz basym qoldaimyn. Birneshe tildi biletin diplomat, saiasi ǵylymdar doktory bolyp, shetelde mol tájiribe jinaǵan Qasym-Jomart Toqaevtyń «Jańa Qazaqstan» baǵdarlamasyn júzege asyrýy úshin biraz ýaqyt kerek. Memleket basshysy Parlament jumysyn jańa satyǵa kóterýge kóp mán berip jatyr ǵoi. Meniń oiymsha, ýnitarlyq memleket bolǵandyqtan bizge bir palataly Parlament jetkilikti siiaqty.
Halyqty Prezidenttiń ainalasyna toptastyratyn nárse eń aldymen - ulttyq ideologiia. Qasym-Jomart Kemelulynyń aityp júrgen sózderinen óz basym úlken úmit kútem. Bolashaqqa degen senimim de mol. Biraq ony bir adam jalǵyz ózi iske asyra almaidy. Halyq qoldap, el artyna erý úshin bilikti mamandar kerek. Halyqtyń jaǵdaiyn biletin, ony tyńdaityn, sózine qulaq asatyn memleket qurý úshin jemqorlyq pen sybailastyq siiaqty teris ádetten múmkindiginshe aýlaq bolýymyz qajet.
Elimiz - álemdegi eń bai memleketterdiń biri. Qazba bailyq ta jetkilikti. Endi ózgeristi sózben emes, ispen júzege asyrýymyz kerek. Eger Memleket basshysyn qoldap «bir jaǵadan bas, bir jeńnen qol shyǵaryp» iske bilekti sybanyp kirisetin bolsaq alynbaityn qamal joq.
«Qańtar oqiǵasynan» keiin Prezidenttiń bastamasymen halyqtyń paidasyna óte kóp sheshim jasalyp jatyr. Demokratiialyq baǵyttaǵy ózgeristerge de birtindep jol ashylady degen úmit bar. Álemdik tájiribege kóz júgirtsek bilimge, ǵylymǵa arqa súiegen eldiń damýǵa zor múmkindigi bar. «Qańtar oqiǵasy» kezinde bizdiń ulttyq, qoǵamdyq sana-sezimimiz de synǵa tústi.
Bizdiń bir ǵana jerimiz, elimiz, Otanymyz bar ekenin Prezident te óz sózderinde árdaiym qaitalap, eske salyp júr. Bul jaidan jai emes. Ony bárimiz túsinip, jan-dúniemizben sezine alsaq álemniń eń ozyq memleketteriniń birine ainalarymyz kúmánsiz.
Jaqypbek ALTAEV,
filosofiia ǵylymdarynyń doktory, professor
