Búgin Parlament Májilisindegi jalpy otyrysta QR Bas prokýrory Jaqyp Asanov ózi basqaryp otyrǵan salanyń basty kemshilikterin atady, dep habarlaidy Ult.kz tilshisi QazAqparat agenttigine silteme jasap.
«Bizdiń zańdarymyzda prokýratýranyń naqty quzyreti aiqyndalmaǵan, iaǵni jumys aýqymy men onyń shegi naqtylanbaǵan. Kez kelgen salanyń óziniń tártibi bar jáne olar soǵan táýeldi. Árbir ministrliktiń, memlekettiń organnyń jaýapty salasy bar, óziniń baǵytynda zańdylyqty qamtamasyz etedi. Al prokýratýra bolsa, solardy qaitalaimyn dep, jaǵalasyp, olardyń jumysyna aralasa beremiz. Kimdi tekseremiz desek te, óz erkimiz. Shynyn aitsaq, biz aralaspaityn jer qalmady. Osynyń kesirinen halqymyzdyń janyna batyp, kóńiline tiip júrgen máselelerdi shetkeri qaldyrdyq. Nege? Óitkeni ýaqytymyz joq deimiz, bizde jalpy qadaǵalaý bar, iaǵni biznesti jáne memlekettik organdardy tekserýimiz kerek dep solai qarai aýyp ketkenbiz. Al qylmystyq protsess óz betinshe qaldy», - dep toqtaldy Bas prokýror «Prokýratýra týraly» zań jobasyn tanystyrý barysynda.
Osy oraida ol elimizde 60-qa jýyq baqylaýshy ári tekserý organdar ekenin, degenmen olardyń jumysyn da prokýratora ózine ilip alǵanyn synǵa aldy.
«Bul organdar da bul úrdiske úirenip ketti. Olar qit etse boldy jaýapkershilikten qashyp, prokýratýraǵa baryńyz deidi. Prokýratýraǵa da bul yńǵaily, iaǵni qalasa tekseredi nemese basqalarǵa ysyra salady. Munyń barlyǵy jemqorlyqqa aparatyn týra jol. Jalpy, kez kelgen problemany sheshetin, búkil aryzdardy qaraityn bir ámbebap organ bolý múmkin emes. Mundai eshbir elde de joq. Biz bolsaq qadaǵalaýshy organbyz dep barlyǵyn úiretip aldyq, biraq qatysy bar ma, joq pa oǵan qaramadyq», - dedi Asanov.
Onyń sózine qaraǵanda, byltyrdyń ózinde prokýratýraǵa 350 myń aryz túsken, osy oraida bunyń barlyǵyn qamtýda tiisti sapa bolmaidy.
Aita keteiik, atalǵan zań jobasynda joǵary qadaǵalaýdyń shekteri men nysandary aiqyndalǵan, onyń negizgi baǵyttary naqtylanǵan, memlekettik organdar men kásipkerlik sýbektiler qyzmetiniń zańdylyǵyn saqtaý úshin joǵary qadaǵalaýdyń shekaralary belgilendi.
