QR Joǵarǵy sotynyń saitynda Jaqyp Asanovtyń qazaqstandyq advokattar men prokýrorlarǵa úndeýi jariialandy, dep habarlaidy "Ult aqparat" QR JS resmi saityna silteme jasap.
Úndeý mátininde halyqtyń memlekettik organdarǵa, onyń ishinde sot jáne quqyqqorǵaý júiesine degen seniminiń joǵarylaǵany týraly aitylady.
"Sot ǵimaraty – barlyǵymyzdyń jinalyp, jumys isteitin jerimiz. Biraq, bizdi biriktiretin ol emes. Barlyǵymyzǵa ortaq – adam taǵdyry, onyń ómiri, quqyqtary men bostandyqtary. Osy qundylyqtardy qorǵaý – bizdiń kúndelikti mindetimiz.
Sotqa kelgen árbir adamnyń taǵdyryna tikelei qatystymyz. Kóp nárse bizdiń biliktiligimizge, jaýapkershiligimizge, adamgershiligimizge bailanysty.
Bizge kelgen adamdar aýrýyna em izdegen naýqas siiaqty úmit arqalap keledi. Dertinen jazylǵan adam qalai qýanyshty bolsa, sottan ádildik tapqan jurt ta solai riza bolady. Bul, sózsiz, memlekettik bilikke senimdi arttyrady", - delingen úndeýde.
Jaqyp Asanov sot júiesin jaqsartyp, ony árbir adamǵa qoljetimdi, túsinikti, ári ádiletti etýge shaqyrdy.
"Sondyqtan Elbasy halyqtyń, biznes pen investorlardyń quqyq qorǵaý jáne sot júiesine senimin bárinen joǵary qoiady. Osy mindetti oryndaý úshin ashyq usynys – bir jaǵadan bas, bir jeńnen qol shyǵaryp, sot júiesin jaqsartaiyq. Ony árbir adamǵa qoljetimdi, túsinikti, ári ádiletti eteiik. Memleket úshin tiimdi jáne únemdi bolýy úshin bar kúshimizdi salaiyq", - dedi basshy.
Elimizdegi osy salanyń aldaǵy ýaqytta nátijeli jumys isteýi úshin qyzmetkerlerden usynys kútetinin jetkizdi.
"Sózsiz, atqarylǵany az emes. Biraq, jetistikke jetý bar, jetistikti jetildirý bar. Sottardyń, sýdialardyń, protseske qatysýshylardyń jumysyn jaqsartý úshin taǵy ne istei alamyz? Pikirlerińizdi bildirseńizder. Ol kóp ýaqytty talap etetin júieli problema nemese tez arada jónge keltirýge bolatyn naqty suraq bolýy múmkin.
Tek bir ótinish – usynystar qysqa ári nusqa bolsa. Sonda ony túsiný de ońai bolady. Máseleniń mánisi, negizdemesi jáne sheshý joly jeńil, qarapaiym tilmen jazylsa", - dep Joǵarǵy sot tóraǵasy
Jaqyp Asanov mańyzdy usynystar nazardan tys qalmaitynyn da aitty.
"Mańyzdy degen usynystar nazardan tys qalmaidy. Olar otandyq sot júiesin odan ári jetildirýge úlesin qossa deimiz. Qatysqandaryńyz úshin aldyn ala alǵysymyzdy bildiremiz", - dedi tóraǵa.
.jpeg)