Aqtaýdaǵy "Oimasha" poligonynynda betinen oq tiip, qaza tapqan sarbaz Marat Barqulov qaitys bolar aldynda jaqyndary men dostarynan aqsha suraǵan eken. Atalǵan jaitty marqumnyń anasy Ásiia Barqulova aitty, dep habarlaidy "Ult aqparat" Stan.kz aqparat agenttigine silteme jasap.
Bloger Damir Kósheevtiń Instagram paraqshasynda sarbazdyń anasy, ákesi jáne dostary túsken video paida boldy.
Marqumnyń ákesi Erbol Barqulovtyń aitýynsha, Marat bastapqyda áskerge barǵysy kelmegen. Alaida bir jyldan keiin ol oiynan ainyp, Otan aldyndaǵy boryshyn óteýge bel býypty.
"Ulym osy jyly óz erkimen ásker qataryna attandy. Ol Qazaqstannyń tańdaýly áskerleriniń qataryna qosylǵanyn maqtan etti. Teńiz jaiaý áskeriniń qataryna qosylǵanyna qýandy", – deidi marqumnyń ákesi.
Marattyń anasy ulynan Shyǵys Qazaqstanda qyzmet etýdi suraǵanyn aitty. Degenmen ol óz tańdaý jasaǵanyn aityp, anasynan alańdamaýyn ótinipti.
"Únemi bári jaqsy dep aitatyn. Kóp aqsha suramaityn, ári ketse eki myń teńge. Sol kúni, beisenbide (5 qyrkúiek) ol qandai da bir sebeptermen aqsha jinai bastady. Eki saǵattyń ishinde bárine qońyraý shalypty. Ákesi men ápkesine bailanysypty. Maǵan ǵana habarlaspady", – deidi Ásiia Barqulova.
Ákesiniń aitýynsha, ádette Marat aqshany jeksenbi kúni suraityn. Soma 2-3 myń teńgeden aspaityn. Biraq keiingi kezderi jii habarlasyp, aqsha suraǵan.
"Maǵan qońyraý shalyp, aqsha surady. Nege dep suradym. 2-3 kún qatarynan telefon soǵyp, aqsha suraǵan kezi boldy. 2-3 myń teńge suraityn. 4-5 qyrkúiek kúnderi sóileskenbiz. Sol kezde ol daýys ulǵaitqysh alý úshin aqsha jinap jatqandaryn aitty. Odan qazan aiyna deiin kúte turýyn suradym. Ózim baryp, jaqsy daýys ulǵaitqysh alyp beretinimdi aittym. Ol birneshe kún qatarynan aqsha aldy. Múmkin ofitserlerdiń biri nashaqor shyǵar", – dedi ákesi.
Qaiǵyly oqiǵaǵa túsinikteme bergen Qazaqstan "Batys" áskerleriniń qolbasshysy Baýyrjan Artyqov armiianyń tolyq qamtamasyz etilgenin aitty. Al áskeri qyzmetkerler arasynda bopsalaýdyń aldyn alý maqsatynda komandirlermen ata-analar arasynda ortaq chat ashyldy deidi.
"Birinshi kúnnen bastap biz ata-analardan, eger mundai fakt anyqtalsa, dereý habarlasýyn suradyq. Jaǵdaidan habardar bolaiyq dedik. Ókinishke qarai, qaiǵyly oqiǵa boldy. Sondyqtan men ásker komandiri retinde ata-anadan, týǵan-týystary men jaqyndarynan keshirim suraimyn. Búgin biz ony sońǵy saparǵa shyǵaryp saldyq", – dedi Artyqov.
Ol Marattyń ólimine kináli ofitser ǵana emes, basqa da jaýapty tulǵalardyń tártiptik jáne qylmystyq jaýapkershilikke tartylatynyn aitty.
10 qyrkúiekte betinen oq jaraqatyn alǵan sarbaz Marat Barqulovty týǵan-týystary sońǵy saparǵa shyǵaryp saldy. Jerleý onyń týǵan aýyly Samarskoede ótti.
Eske salsaq, buǵan deiin Mańǵystaý oblysynda boryshyn ótep júrgen sarbaz poligonda betine oq tiip, kóz jumǵany týraly jazǵan edik. Bas áskeri prokýratýra sarbaz ólimine qatysty istiń “qasaqana adam óltirý” babymen tergeletinin málimdedi.
