Elorda ákimdiginiń qoldaýymen 7-9 mamyr kúnderi grek-rim kúresinen qazaqtan shyqqan tuńǵysh Olimpiada chempiony, Eńbek eri Jaqsylyq Úshkempirovti eske alýǵa arnalǵan halyqarlyq týrnir ótedi, dep habarlaidy "Ult aqparat".
Nur-Sultan qalalyq dene shynyqtyrý jáne sport basqarmasynyń málimetinshe, 2001-2003 jyly týǵan jasóspirimder arasynda ótetin týrnirde balýandar 55, 60, 63, 67, 72, 77, 82, 97, 130 keli salmaq dárejelerinde baq synaidy.
Bairaqty básekege Qazaqstan, Resei, Grýziia, Ýkraina, Tájikstan, Qyrǵyzstan jáne Ózbekstan elderinen 250-den asa sportshy qatysady. Jarys jeńimpazdary men júldegerleri diplom, medaldarmen marapattalady.
«Eldegi karantin talaptaryna sáikes halyqaralyq týrnir jankúiersiz ótedi. Kórermender jarysty Qazsport arnasynan tikelei efirde tamashalai alady. Jarystyń saltanatty ashylý rásimi 7 mamyr kúni saǵat 16:00-de bolady», - dedi basqarmadan.
