Olimpiada chempiony, Qazaqstannyń Eńbek eri Jaqsylyq Úshkempirov Qordaidaǵy janjalǵa bailanysty halyqty sabyrǵa shaqyrdy, dep habarlaidy QazAqparat.
«Táýelsizdik alyp, qandai memleket ekenimizdi búkil dúnie júzine tanytyp jatyrmyz. Bárimiz tatý-tátti ómir súrip jatyrmyz. Kesheden beri Jambyl oblysyndaǵy oqiǵany estidim. El bolǵannan keiin ártúrli jaǵdai bolady. Bizdiń babalarymyz qanshama ǵasyr boiy qiynshylyqty basynan keshirdi. Babalarymyzdyń ár ýaqytta óziniń ustamdylyǵymen, sabyrlyǵymen, danalyǵymen, aýyzbirshilikpen eldi ustap otyrǵanyn umytpasaq deimin», - dedi Jaqsylyq Úshkempirov.
Qazaqstannyń Eńbek Eri ózi árdaiym aýyzbirshilikpen, yntymaqty qalaitynyn jetkizdi.
«Men otyz jasymda Olimpiada chempiony boldym. Qansha jyl sabyrlylyqtyń arqasynda qiynshylyqtardy bastan ótkerdik. Qazaǵymnyń myqtylyǵynyń arqasynda men sondai biikke kóterildim. Sol sebepti bárimiz sabyrlylyq saqtai otyryp, osyndai kikiljińdi birge toqtatyp, jastarǵa úlgi bolatyndai sóz aityp, qazaqtyń yntymaqsúigish el ekenin kórsetýimiz kerek», - dedi ol.
Jaqsylyq Úshkempirov jastardyń óz keleshegin oilaýy kerektigin jetkizdi.
«Ózimiz búldirip jatsaq, keiingi býynǵa qandai tárbie beremiz. Barlyq qiynshylyq jaǵdaida sabyrmen ortaq sheshimge keleiik. Elim men jurtym aman bolsyn. Úlkendi qurmettep ósken halyqpyz. Sondyqtan aqsaqaldarymyzdy tyńdap, bir-birimizge tek jastarǵa úlgi bolarlyq is kórsete bilýimiz kerek dep oilaimyn. Elimiz aman, jurtymyz tynysh bolsyn», - dedi ol.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev osy oqiǵaǵa qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
