Almaty oblysy ákiminiń orynbasary Jaksylyq Omardyń tóraǵalyǵymen óńir jastarynyń kezekti keńesi ótti.
Jetisý jeriniń ár tarabynan jiylǵan jastar oblystyq jastar saiasaty basqarmasynyń jyldyq qorytyndysyn shyǵaryp, keler jylǵa jospar qurdy, - dep xabarlaidy óńirdegi tilshimiz.
Jiyn Almaty oblysynyń jastar saiasaty máleleleri boiynsha basqarma basshysy Aidyn Nurmuxambettiń baiandamasynan bastaldy. Negizgi esepti kezeńde atqarylǵan sharalardy naqty tizbektep ótken basqarma basshysy ózekti máselelelerdiń de basyn ashty. Onda jastardyń óz-ózine qol jumsaý derekterimen qatar, óskeleń urpaqtyń zańdy belden basý faktileri aityldy.
Atalǵan máselelerdi nazarǵa alǵan oblys ákiminiń orynbasary Jaksylyq Omar óńirdegi jastar saiasatyna tyń kózqaras pen jańa bastamalar qajet ekendigin alǵa tartty.
"Qai kezdi alyp qarasań da, qoǵamnyń qozǵaýshy kúshi jastar bolyp tabylady. Demek, búgin de hám bolashaqta da eleýli ózgeristerdiń oryn alýy - ózderińdei jastyń qolynda. Ýaqyt syzyǵy jyljyǵan saiyn jaýaptar ǵana emes, qoiylar suraqtar da eskirip, qajetsizge ainalady. Búgin bylai edi, erteń nege ózgeshe boldy dep shúiligýge bolmaidy. Sondyqtan saýaly men jaýaby únemi jańarýdy qajet etetin máseliniń bastysy bop jastardyń hál-ahýaly turmaq. Jańa zamannyń jastarynyń "jańa talaptaryn" elemeý ýaqyt aǵymyn eskermegenmen birdei.
Aimaqta dúrkirep ótetin sharalardyń, ártúrli baǵyttaǵy keshterdiń bolǵany artyq emes. Oǵan shekteý qoia almaimyz. Degenmen, bul - jastar saiasatynyń basty mindeti emes ekenin de esten shyǵarmaýymyz kerek. Jastar arasyndaǵy qylmystyń órshýi ári óz-ózine qol jumsaý faktileriniń jiileýi - sózimniń aiqyn dáleli bolmaq. Onyń ústine qoǵamdaǵy dini ahýal da kún ótken saiyn kúrdelenip barady. Bizge ózimizdiń qaragóz baýyrlarymyzdyń ártúrli aǵymnyń jeteginde ketpegeni kerek. Sol sebepti barlyq qiyn máseleniń aldyn-alǵanymyz jón. Jastarǵa qatysty jalpy baǵyttaǵy jumystardy jańǵyrtý qajet. Óitkeni búginnen jańa ózgeristerge aparatyn sara joldyń basyn qalap alǵanymyz durys bolmaq. Osy oraida, atalǵan máselege qatysty arnaiy jumys tobyn quryp, aýqymdy analiz jasalyq. Sodan soń anyqtalǵan ótkir máseleler negizinde "Jastar joly" dep atalatyn qujat ázirlenýi tiis. Qujatta birinshi kezekte aýyl jastarynyń máselelerin tarqatý - basty nazarda turatyn taraý bolýy mindet. Ekinshi kezekte - jastardyń jumyssyzdyǵyn joiý máselesi. Úshinshiden - jastardyń bos ýaqytyn tiimdi paidalanýyna jol ashatyn múmkindikter qarastyrýymyz kerek. Tórtinshiden - óskeleń urpaq arasyndaǵy qylmysty aldyn alý jáne besinshi kezekte - múmkindigi shekteýli jastardy áleýmettendirý syndy máseleler kóterilýi qajet", - dep, naqty tapsyrmalardy júktegen oblys ákiminiń orynbasary atalǵan jumysqa jastardy atsalysýǵa shaqyrdy.
Óz kezeginde, aimaqtardan jiylǵan jastar bastamany biraýyzdan quptap, óz qoldaýlaryn jetkizdi. Shara sońynda, aimaq alamandary atqarylǵan jumystaryna sai marapattalyp, baǵaly syilyqtarǵa ie boldy.
Ult portaly
