Memleket basshysynyń «Bolashaqqa baǵdar: rýhani jańǵyrý» atty maqalasyn nasihattaý maqsatynda OQO-daǵy «Ǵalamat» qoǵamdyq birlestigi «Otyrar» oblystyq ǵylymi-ámbebap kitaphanasymen birlesip, «Jaqsy dástúr – otbasynyń tiregi» taqyrybynda birneshe kezdesý uiymdastyrdy.
Aýdan, qalalarda ótken kezdesýlerge jergilikti turǵyndar, oqyrmandar, stýdentter men oqýshylar, jas jáne kópbalaly otbasylar qatysyp, oilarymen bólisip, pikir almasty. Otbasy kúnine arnalǵan keshterdiń birine qonaq retinde qatysqan kitaphana direktory K.Aidarbekova, oblystyq ádet-ǵuryp jáne salt-dástúr ortalyǵynyń direktory J.Taǵaev, OQO din isteri basqarmasynyń din máselelerin zertteý ortalyǵynyń mamany U.Aliakbaruly, oblystyq áielder keńesiniń tóraiymy B.Jandosova, psiholog G.Malǵaidarova otbasy jáne onyń qundylyqtary máselesin dini, áleýmettik-ekonomikalyq, saiasi jáne psihologiialyq turǵydan jan-jaqty taldady. Ardagerler keńesi, ájeler alqasy músheleri, muǵalimder men ardaqty analar tájiribelerimen bólisip, urpaq tárbiesi tóńireginde jan-jaqty oi qozǵap, jastarǵa batasyn berdi.
«Ǵalamat» qoǵamdyq birlestigi túsirgen beinebaiandar men derekti filmder kópshilikke usynylyp, talqylandy. Kezdesýge qatysqan film keiipkerleri ulttyq salt-dástúrimizdi, ádep-ǵurpymyzdy qasterlep, saqtaýǵa shaqyrdy. Joba aiasynda «Otyrar» telearnasy stýdiiasynda oblystyq áielder keńesi, «Arýlar» áielder klýbynyń músheleri, BAQ ókilderi men jastardyń qatysýymen «Berik otbasy – kúshti memleket» atty telehabar túsirildi. Telehabarǵa qatysqandar baqytty otbasyn qurý jáne saqtaý máselesi tóńireginde aqyl-keńesterin aityp, baǵyt-baǵdar berdi. Pedagogtar áýleti Ibashevtar, sportshylar áýleti Tólegenovter ómirlik tájiribeleri jaiynda áńgimelep, bala tárbiesindegi ustanymdaryn aitty.
Joba aiasynda «Jaqsy dástúr – otbasynyń tiregi» atty aqparattyq-ádistemelik kitapsha shyǵaryldy. Osy taqyryppen Shymkent qalasyndaǵy ortalyq kóshelerge 2 bilbord ilindi. Ulttyq salt-dástúr men ádep-ǵurypty nasihattaǵan eki beinerolik daiyndalyp, jergilikti telearnadan kórsetildi. Joba boiynsha senim telefony qyzmet atqarady. Búgingi tańda senim telefonyna otbasylyq jaǵdai boiynsha túsken 50-den asa suraqqa psiholog jaýap berýde. Ótken jyly senim telefonyna tek oblys turǵyndary qońyraý shalsa, qazir elimizdiń ózge óńirlerinen de suraqtar men usynystar túsýde. Atqarylyp jatqan is-sharalar otbasynyń buzylýyna jol bermeýdi, ondaǵy zorlyq-zombylyq áreketterine tosqaýyl jasaýdy kózdeidi.
Dana MAMANOVA,
«Ǵalamat» qoǵamdyq birlestiginiń tóraiymy.
