Eldiń ornyqty damýy úshin memlekettiń básekege qabilettiligin arttyrý jáne ártaraptandyrý boiynsha tereń qurylymdyq reformalar qajet. Bul týraly QR Prezidenti janyndaǵy QSZI Áleýmettik-ekonomikalyq zertteýler bóliminiń aǵa ǵylymi qyzmetkeri Anna Alshanskaia aitty, dep habarlaidy QazAqparat.
«Alty aidan beri álemniń barlyq elderi buryn-sońdy bolmaǵan COVID-19 virýsymen kúresip, álemdik ekonomika pandemiia saldarynan aýyr zardap shegip otyr. Dúniejúzilik bank boljamyna sáikes 2020 jyly jahandyq JIÓ 5,2% tómendeidi dep kútilýde. Sonymen qatar, qazirgi daǵdarystyń ereksheligi – onyń qanshaǵa sozylarynyń belgisiz ekendigi bolyp otyr. Pandemiianyń uzaqtyǵy kóptegen faktorlarǵa – vaktsinanyń jasalýyna, «ujymdyq immýnitettiń» qalyptasýyna, virýstyń yqtimal órshýine, sonymen qatar memleketterdiń shuǵyl áreketteriniń tiimdiligine bailanysty», - deidi sarapshy.
Memleket basshysy Q.Toqaevtyń qatysýymen ótken Úkimettiń keńeitilgen otyrysy el ekonomikasyn daǵdarystyq basqarý jáne koronavirýstyń taralýyna qarsy kúres máselelerine arnaldy. Osylaisha, 2020 jyldyń birinshi jartyjylynda Qazaqstannyń JIÓ 1,8%-ǵa tómendegen.
«Ásirese, qyzmet kórsetý sektory pandemiia áserin airyqsha sezindi – bul kezeńde óndiris 5,6% tómendegen. Karantindik sharalar men shikizat naryǵyndaǵy turaqsyzdyq saldary eldiń biýdjettik júiesine de áser etti – biýdjettiń shyǵyny shamamen 1,7 trln teńgeni qurady. Koronovirýstyq pandemiia eńbek naryǵyna da yqpal etti. Eńbek jáne halyqty áleýmettik qorǵaý ministrliginiń málimeti boiynsha, jumyspen qamtý organdarynda 2020 jyldyń mamyr aiynyń sońynda jumyssyz retinde tirkelgender sany 161,3 myń adamdy nemese jumys kúshiniń 1,7% qurady», - dedi A. Alshanskaia.
Sondai-aq, daǵdarysqa qarsy qabyldanǵan sharalarǵa qaramastan, pandemiianyń jalǵasýy men jańa sanitarlyq shekteýler biznes qurylymdaryn da, halyqtyń túrli toptaryn da qosymsha qoldaý sharalaryn qabyldaýǵa májbúrlep otyr.
«Osylaisha, Prezident tapsyrmasymen Úkimet pen Ulttyq Bank aǵymdaǵy jaǵdaidyń nasharlaýy múmkin jaǵdaiǵa áleýmettik-ekonomikalyq sharalardyń jańa paketin ázirleidi. Sonymen birge, ortalyq jáne jergilikti memlekettik organdardyń keibir kemshilikteri men qatelikterin eskere otyryp, Memleket basshysy koronavirýstyq pandemiiamen kúreske bólingen biýdjet qarajatyn jumsaýdyń tiimdiligin taldaýdy tapsyrdy. Prezident aitqandai, jalpy COVID-19 pandemiiasynan týyndaǵan qazirgi daǵdarys eldiń negizgi ekonomikalyq problemalaryn, áleýmettik júieniń kemshilikterin jáne Úkimettiń qatelikterin aiqyndady. Eldiń ornyqty damýy úshin memlekettiń básekege qabilettiligin arttyrý jáne ártaraptandyrý boiynsha tereń qurylymdyq reformalar qajet», - dedi A. Alshanskaia.
