M.Áýezov atyndaǵy Qazaq Memlekettik akademiialyq drama teatry Elbasy N.Á.Nazarbaevtyń «Rýhani jańǵyrý» baǵdarlamasy aiasynda tolymdy eńbekter atqaryp keledi. Máselen, 7-21 qyrkúiek aralyǵynda Atyraý qalasy men oblys aýdandaryndaǵy Qazaqstannyń Eńbek Eri, KSRO halyq artisi Asanáli Áshimovtiń 80 jas mereitoiyna arnalǵan úlken gastroldik sapar, QR Mádeniet jáne sport ministrliginiń qoldaýymen qazan aiynyń basynda ótken London sapary, teatr maýsymasharyna arnalǵan «Teatr álemindegi rýhani jańǵyrý» atty Almaty qalasyndaǵy 8 teatrdyń basyn qosqan kórme jáne t.b. is-sharalar atalmysh baǵdarlama aiasynda jasaldy.
Teatr ujymynyń «Rýhani jańǵyrý» aiasyndaǵy josparly jumystary Jambyl men Ońtústik Qazaqstan oblystaryndaǵy kishi gastroldik saparmen jalǵasyn taýyp, bul is-sapar barysynda teatr ujymy aýdan ortalyqtary men eldi-mekender turǵyndarynyń nazaryna repertýardaǵy Nemat Kelimbetovtiń «Úmit úzgim kelmeidi» dramasyn usynǵan bolatyn. Teatr ujymynyń kelesi bir aýqymdy jobasy – Tokio sapary bolyp otyr.
Elbasy N.Á.Nazarbaevtyń «Rýhani jańǵyrý» baǵdarlamasynyń «Jahandaǵy zamanaýi qazaqstandyq mádeniet» atty Halyqaralyq jobasy aiasynda QR Mádeniet jáne sport ministrliginiń qoldaýymen M.Áýezov atyndaǵy Qazaq Memlekettik akademiialyq drama teatry jeltoqsan aiynyń 19-26 kúnderi Japoniia astanasy Tokio qalasyna gastroldik saparǵa attanady. Bul sapar barysynda teatr ujymy repertýardaǵy «Aqtastaǵy Ahiko» spektaklin sahnalap, «Uly Dala Eli» atty Ult rýhaniiatyn ulyqtaityn kontserttik baǵdarlamany japondyqtardyń nazaryna usynyp, teatr mýzeiinen oryn alǵan qundy jádigerlerimiz ben ulttyq qundylyqtarymyzdy tanytatyn kórme uiymdastyrady.
Elimiz úshin aýqymdy Halyqaralyq jobanyń aiasyndaǵy «Tokio saparyna» daiyndyq barysynda 17 qarashadaǵy «Aqtastaǵy Ahiko» qoiylymyn ideia avtorlary: N.Dýlatbekov, E.Bilál jáne Qazaqstandaǵy japon azamattary men japon tilin meńgerip júrgen izdenýshiler arnaiy tamashalap, spektakl sońynan teatr ujymynyń qatysýymen qoiylymǵa kelgen qonaqtar óz pikirlerimen, qoiylymnan alǵan áserlerimen bólisken bolatyn. Sonymen qatar, bul aýqymdy da salmaqty, mazmuny men máni tereń, maqsaty aiqyn is-saparǵa teatr ujymy asqan jaýapkershilikpen barlyq tehnikalyq jáne shyǵarmashylyq múmkindikterdi paidalana otyryp qyzý daiyndyq júrgizdi.
Qazaq óneriniń qarashańyraǵy sanalatyn ákem-teatrdyń – «Tokio sapary» ult kóshbasshysy Nursultan Ábishulynyń baǵyt-baǵdary negizinde jasalǵan «Jahandaǵy zamanaýi qazaqstandyq mádeniet» atty Halyqaralyq jobasyna qosylǵan úles jáne qazaq ónerin álemge tanytýda jasalǵan nyq qadam dep túsingenimiz abzal. Bul gastroldik sapar bir ǵana teatrdyń emes, kúlli qazaq óneriniń, qazaq mádenietiniń mereiin ústem etip, mártebesin kóteretin is-shara bolatynyna senimdimiz.
Gúlziia Sádýaqas
