Búgin jalpyulttyq aza tutý kúni. Osyǵan qarai aqyn, «Qurmet» ordeniniń iegeri Jadyra Dáribaeva koronavirýs infektsiiasynan qaza bolǵandardyń jaqyndaryna kóńil aitty, dep habarlaidy QazAqparat.
«Bul indet óte qiyn boldy. Aýyl-aimaqtaǵylar habarlasyp, kómek surap jatyr. Olardyń shyryldaǵan úni, janaiqaiy Úkimetke jetip, sharalar qabyldanyp jatyr. Dárigerler tapshylyǵy bar, biraq bar shama-sharqy jetkenshe kúresýde. Degenmen bári baiaý júrip jatyr, sondyqtan bilik tarapynan úlken shara qoldaný kerek», - deidi aqyn Jadyra Dáribaeva.
Ol bul indet jastardyń da ómirin qiyp jatqanyn aitty.
«Onsyz da sany az qazaqstandyqtardyń indet saldarynan ómirden ozyp jatqany júregimizdi aýyrtady. Eń qiyny - 40-50 jastaǵy adamdar da dertti jeńe almai, ajal qushýda. Qaza tapqandardyń jany jánnatta bolyp, aldynan jarylqasyn. Olardyń týǵan-týystaryna qaiǵyra kóńil aitamyn. Mundai qaiǵy endi qaityp bolmasyn dep tileimin», - deidi ol.
