2 mamyrda Qazaqstannyń depozitterge kepildik berý qory taratylatyn segiz banktiń salymshylaryna tólem tóleýdi oidaǵydai aiaqtady, dep habarlaidy QazAqparat.
Atalǵan merzimge deiin talap etilmegen kepildi ótem somalary salymshylardyń Biryńǵai jinaqtaýshy zeinetaqy qorynda ashylǵan jeke zeinetaqy shottaryna erikti zeinetaqy jarnasy retinde aýdarylady.
QR zańnama talaptaryna sáikes, ótem somasyn aýdarý tólem merzimi aiaqtalǵan kúnnen bastap, kúntizbelik 30 kún ishinde, iaǵni 2022 jyldyń 31 mamyryna deiin júzege asyrylady.
Zeinetaqy qoryna «Valiýt-Tranzit Bank» AQ, «Qazinvestbank» AQ, «Delta Bank» AQ, «Qazaqstan Eksimbanki» AQ, «Qazaq Banki» AQ, «Astana Banki» AQ, «Tengri Bank» AQ jáne «AsiaCredit Bank (AziiaKredit Bank)» AQ salymshylarynyń ótem somalary aýdarylady.
Bul salymshylar úshin ótem somasynyń BJZQ-ǵa aýdarylýy jaiynda ýaiymdaýdyń esh qajeti joq – bank klientterine atalmysh rásim boiynsha qosymsha aqparat beriledi.
Depozitorlar ótem aqshalarynyń zeinetaqy shottaryna eseptelgendigin aǵymdaǵy jyldyń 31 mamyrynan keiin BJZQ resmi saityndaǵy jeke kabineti, mobildi qosymshasy jáne qordyń jergilikti keńsesine barý arqyly óz betimen kóz jetkize alady.
Sondai-aq bul aqparatty «elektrondyq úkimet» portaly nemese QDKBQ-ǵa tikelei júginý arqyly alýǵa bolady.
Sonymen qatar tólem merzimi aiaqtalǵan soń da, onyń ishinde talap etilmegen ótem somasy BJZQ-ǵa aýdarylǵan jaǵdaida da zańnama júzinde salymshy úshin ózine tiesili ótem somasyn alýǵa ótinish berý múmkindigi qarastyrylǵan.
Salymshy ótinishpen qatar tólem merzimi barysynda ótinish berýge kedergi keltirgen myna mán-jaidyń biri bolǵanyn rastaityn qujatty qosa usynady: depozitordyń áskeri qyzmetke kirýi, QR sheginen tys jerde nemese bas bostandyǵynan aiyrý oryndarynda bolýy.
Salymshynyń mura qabyldaýy, mura ashý jáne ony qabyldaýǵa qatysty basqa da sebepter, sondai-aq sot anyqtaǵan ózge de mán-jai da osyǵan jatady.
