Mańǵystaý oblysynda er adam 5 myń shaqyrymdy baǵyndyrýdy josparlap otyr, dep habarlaidy "Ult aqparat" Lada.kz saityna silteme jasap.
Beineý óńiriniń 64 jastaǵy turǵyny Rabbim Borashev 26 shilde men 11 tamyz aralyǵynda Parijde ótetin jazǵy olimpiada oiyndaryn tamashalaý úshin velosherýge attandy.
Er adam zeinet jasyna deiin qurylys salasynda eńbek etken. Sońǵy jyldary ol velosportqa qyzyǵyp, birneshe jarystarǵa qatysyp úlgeripti.
Parijge velosipedpen jetý úshin arnaiy daiyndyq qajet. Jospar boiynsha ol 7 memlekettiń aýmaǵyn kesip ótip, 5 myń shaqyrym júrýi kerek.
"Olimpiadaǵa barý meniń armanym dep aita alamyn. Jas kezimde múmkindik joq edi, endi ýaqyt keldi, osyndai sheshim qabyldadym. Aldymen Aqtaýdan Bakýge baramyn. Onda Qazaqstannyń bas konsýldyǵynyń ókilderi kútip, meni Grýziiamen shekaraǵa deiin ertip barady. Bul – men úshin úlken qoldaý. Sodan keiin men Batýmige baryp, "Uly dalaǵa joryq" jobasyna qatysamyn. Maýsym aiynda Túrkiiaǵa ketemin. Vengriia, Avstriia, Germaniia arqyly júrip, Frantsiiaǵa jetýdi josparlap otyrmyn", – dedi Borashev.
