Foto: ashyq derekkóz
Petropavl qalalyq soty FK «Qyzyljar» klýbynyń burynǵy bas býhgalteri Olga Zamelatskaiaǵa qatysty úkim shyǵardy, dep habarlaidy Ult.kz Halyqstan telegram arnasyna silteme jasap.
Sot ony 7,5 jylǵa bas bostandyǵynan aiyryp, jalpy somasy 367 million teńgeden astam qarjyny óteýge mindettedi.
63 jastaǵy Olga Zamelatskaia biýdjet qarajatyn jymqyrý jáne salyq tóleýden jaltarý baptary boiynsha kináli dep tanyldy. Sot sheshimine sáikes, ol klýb paidasyna 70 million teńge, memlekettik kirister organdaryna 287 million teńge, sondai-aq memleket kirisine 10,6 million teńge tóleýi tiis.
Bul soma zeinet jasyndaǵy áiel úshin asa aýyr júk ekeni aitylyp otyr. Aita keterligi, is aiasynda klýbtyń burynǵy prezidenti Grigorii Loriia qylmystyq jaýapkershilikke tartylmaǵan.
Tergeý deregine sáikes, 2023 jyly FK «Qyzyljar» Soltústik Qazaqstan oblysynyń biýdjetinen 1,7 milliard teńge alǵan. Qarajatty bólý kezinde eseptilikte burmalaýlarǵa jol berilip, shamamen 128 million teńge túrli shemalar arqyly shyǵarylǵany anyqtalǵan. Sonymen qatar, 287 million teńgeden astam salyq mindettemeleri ádeii tómendetilgeni aityldy.
Sot barysynda klýb qyzmetkerleri qarjy komandany ustaýǵa — tamaqtaný, áýe reisteri, meditsinalyq qyzmet pen syiaqylarǵa jumsalǵanyn málimdedi. Komandada jeke aspaz jumys istep, taǵam ratsiony belgilengen normalarǵa sai bolǵan. Alaida býhgalterlik esep zań talaptaryna sai júrgizilmei, keibir operatsiialar qolma-qol aqshamen rásimdelgen.
Olga Zamelatskaia óz kinásin tek 10 million teńgege qatysty epizod boiynsha ǵana moiyndap, qarajatty jymqyrýǵa qasaqana nieti bolmaǵanyn alǵa tartty. Qorǵaý tarapy protsessýaldyq zańbuzýshylyqtardy kórsetip, sýdiaǵa qarsylyq bildirip, klýbtyń burynǵy basshylyǵyn jaýapqa tartýdy talap etken.
Soǵan qaramastan, sot usynylǵan dálelderdi jetkilikti dep tanyp, naqty bas bostandyǵynan aiyrý jazasyn taǵaiyndady.
