Zeinetaqynyń bir bóligin alýǵa ótinim bergen 80 myń adamnyń 20 myńy baspanany ipotekasyz, tikelei satyp alǵan. Bul týraly «Otbasy bank» basshysy Lázzat Ibragimova málim etti, dep habarlaidy QazAqparat.
Lázzat Ibragimova zeinetaqynyń bir bóligin paidalaný arqyly alynatyn úidiń baǵasy, dástúrli jolmen satyp alynǵan baspanaǵa qaraǵanda qymbatyraq bolatyny týraly aqparatqa jaýap berdi.
«Árine, mundaidy biz qoldamaimyz. Áleýmettik jeliler arqyly kóp aqparat tarattym. Aqylǵa shaqyrdym. Biz búginge deiin jumysty aiaqtaǵan 80 myń ótinimniń ishinde 40 paiyzynda azamattar qaryzyn japty. Iaǵni 30 myń qaryz alýshy bereshegin jabý úshin zeinetaqynyń bir bóligin paidalanyp úlgerdi», - dedi Lázzat Ibragimova BaigeNews.kz portalynyń YouTube-arnasyndaǵy suhbatynda.
Klientter ipotekalyq qaryzdarynyń 50 paiyzyn kommertsiialyq bankterde japsa, qalǵany «Otbasy banktegi» beresheginen qutylǵan.
«Bir qyzyǵy, bári de ipotekalyq ótinim orasan zor deńgeide kóbeiip ketedi dep oilasa kerek. Alaida, shyntýaitynda, 20 myń ótinimniń iesi zeinetaqynyń bir bóligin paidalanyp, úidi tikelei satyp ala alady. Bul degenińiz azamattardyń birazynda ipotekany paidalanbai-aq úi alýǵa múmkindigi bolǵanyn bildiredi. Biz zeinetaqynyń shekti somadan artylǵan bóligin qolma-qol aqshasyz, satýshyǵa nemese qurylys kompaniiasyna joldaimyz», - dedi ol.
