Keshe elimizde turǵyn úi jaǵdaiyn jaqsartý úshin birjolǵy zeinetaqy tólemderin paidalaný erejesi bekitildi.
Oǵan orai «Talap» qoldanbaly zertteýler ortalyǵynyń direktory Rahym Oshaqbaev atalǵan zeinetaqy aýdarymdaryn paidalaný erejesin túsindirdi, dep habarlaidy QazAqparat.
Erejege sáikes, turǵyn úi jaǵdaiyn jaqsartqysy keletinder bir jolǵy zeinetaqy tólemin bir banktik qaryz sharty sheńberinde turǵyn úidi jáne (nemese) jóndeý júrgize otyryp turǵyn úidi satyp alýǵa arnalǵan turǵyn úi qaryzdaryn ishinara nemese tolyq óteý, ipotekalyq turǵyn úi qaryzyn qaita qarjylandyrý úshin bastapqy jarna engizý úshin paidalana alady.
«Bul sizdiń atalǵan aqshany satyp alǵan úiińizge ǵana jóndeý jumystaryna jumsai alasyz degendi bildiredi. Eger sizde jeke úiińiz bolsa jáne bireýlermen jóndeý jumystaryn júrgizýge kelisimshart jasassańyz, onda qarajatty jumsai almaisyz. Eger siz máselen qurylys kompaniiasynan páter satyp alsańyz jáne onda jóndeý quny kirgizilgen bolsa, onda qarajatty jumsai alasyz. Jáne de siz zeinetaqy aqshasy esebinen jóndeý jumystaryna tólem jasaisyz. Bul sharttar kórsetilgen kelisimshart usynatyn shyǵarsyz dep oilaimyn», - dedi Rahym Oshaqbaev.
Sonymen qatar ipotekalyq turǵyn úi qaryzyn ishinara nemese tolyq óteý, turǵyn úi qurylys jinaqtary júiesi boiynsha jeke turǵyn úi salý (nysanaly maqsaty bar jer ýchaskesin satyp alýdy qosa alǵanda – jeke turǵyn úi qurylysy nemese jeke qosalqy sharýashylyq), turǵyn úi qaryzyn alý erejesin de túsindirdi.
«Eger siz jer satyp alyp, sol jerge úi salǵyńyz kelse, onda zeinetaqy jinaǵyn paidalana alasyz», - dedi ol.
Rahym Oshaqbaev turǵyn úi qurylysy baǵdarlamalary men daǵdarysqa qarsy baǵdarlamalar sheńberinde berilgen satyp alý quqyǵymen turǵyn úidi uzaq merzimdi jaldaý sharttary boiynsha bereshekti ishinara nemese tolyq óteýge qatysty mundai kelisimshart bolsa zeinetaqy jinaǵyn alýǵa bolatyndyǵyn aitty.
«Bul zańǵa moiynsunatyn orta sanattaǵy azamattardy yntalandyrýǵa baǵyttalǵan Prezidenttiń óte jaqsy ári durys reformasy. Zeinetaqy júiesindegi 761 myń qazaqstandyqta jetkilikti shek bar. Memleket úshin osynaý zeinetaqy qarajatynyń negizinen bastapqy turǵyn úi satyp alýǵa jumsalǵany mańyzdy. Sol kezde ekonomika úshin qajetti pozitivti, mýltiplikativti áser bolady. Endi baǵa ósimin shekteýge umtylǵan jón», - dedi Rahym Oshaqbaev.
