Qazaqstandyqtarǵa zeinetaqy jinaǵyn paidalanýǵa ruqsat berýge qatysty usynystar jýyrda Prezident Ákimshiligine engiziledi. Sheshimdi Prezident Qasym-Jomart Toqaev qabyldaidy. Bul týraly búgin Úkimet basshysynyń orynbasary Berdibek Saparbaev aitty, dep habarlaidy Sputnik Qazaqstan tilshisi.
Saparbaevtyń aitýynsha, Úkimet janynan qurylǵan jumys toby zeinetaqy jinaǵyn paidalanýǵa qatysty usynystar ázirlegen. Tiisti esepteýler júrgizilgen. Árbir qazaqstandyqtyń esepshotynda qansha aqsha bary, azamattardyń ortasha ómir súrý jasy, buǵan qosa, zeinetke shyqqannan keiin, ol adamnyń shamamen qansha jyl ómir súretini eskerilgen.
"Biz taiaýda usynystardy prezident ákimshiligine beremiz. Prezident sheshim qabyldaidy", - dedi Saparbaev Úkimette ótken baspasóz máslihatynda.
Onyń aqparatynsha, qazir biryńǵai jinaqtaýshy zeinetaqy qoryna 10 trillion teńge jinalǵan, 9 million 600 myń salymshysy bar.
"Bir salymshyǵa eseptegende orta eseppen 1 million teńgeden keledi. Bizdiń esebimiz boiynsha, erteń ol azamat zeinetke shyqqanda jaqsy ómir súrýi úshin eń kem degende 11-12 million teńge jinaǵy bolýy tiis. Biz onyń bárin eseptep qoidyq. Memleket basshysy qandai sheshim qabyldaidy, sodan keiin biz ony júzege asyramyz", - dedi ol.
Aita ketsek, qyrkúiek aiynyń basynda Memleket basshysy Qasym-Jomart Toqaev zeinetaqy jinaqtaryn baspana alýǵa paidalanýǵa qatysty tapsyrma bergen bolatyn.
