Elimizde zeinetaqy jinaǵyn paidalaný boiynsha jas shegin bekitý usynyldy. Bul týraly Parlament Senatynda ótip jatqan dóńgelek ústelde Eńbek jáne halyqty áleýmettik qorǵaý ministri Birjan Nurymbetov aityp berdi, dep habarlaidy QazAqparat.
«Ár jasqa óziniń tiisti qajetti somasy bolady. Osydan asqanyn alýǵa bolady dep jatyrmyz. Mysaly, 30 jastaǵy er azamatqa qajetti zeinetaqy somasy – 6,7 mln teńgeni quraidy. Sebebi, onyń 33 jyldai áli de zeinetke jetkenshe jinaýǵa múmkindigi bar. Elý jastaǵy er adamǵa 7,2 mln teńge. Al endi zeinet jasyna jetken er azamatqa 8,2 mln teńge», - dedi Birjan Nurymbetov Parlament Senatynda ótken dóńgelek ústel barysynda.
Ministr qazaqstandyq zeinetaqylyq júiege singapýrlyq tájiribeni engizý múmkindigine qatysty pikirin bildirdi.
«BAQ quraldary zeinetaqylyq jinaq júiesiniń singapýrlyq modeli týraly kóp jazǵanyn bilemiz. Óz basym singapýrlyq tájiribeni álemdegi eń úzdikterdiń biri dep bilemin. Qazirgi tańda Singapýrda zeinetaqy jarnalary úsh shot boiynsha bólinedi: negizgi, arnaiy jáne meditsinalyq shot. Singapýr azamaty 55 jasqa kelgen kezde negizgi jáne arnaiy shot zeinetaqylyq shot bop biriktiriledi de, jarna stavkasy jasyna bailanysty ózgeredi. Bul rette bir jaidy aita ketkim keledi: jumys tobynda osy máseleni talqylaǵan kezde Qazaqstannyń zeinetaqy júiesine singýparlyq modeldi engizý – edáýir problema týǵyzatynyna bailanysty ortaq paiymǵa keldik», - dedi ol.
Birjan Nurymbetov nelikten olai ekenin de atap ótti.
«Birinshiden, eki elde stavkalar ártúrli. Máselen, Singapýrda zeinetaqy stavkasy 37 paiyzdan aýdarylsa, bizde – 10 paiyz. Singapýrda 55 jasqa deiin jumysshy 20 paiyzyn, jumys berýshi 17 paiyzyn aýdaryp otyrady. Keiin stavkalar ózgeredi. Qazaqstanda jumysshy zeinetaqy qoryna 10 paiyzyn aýdarady. Al jumys berýshi eshteńe aýdarmaidy. Ekinshiden, Singapýrda ortasha jalaqy - 42,7 myń dollar. Iaǵni, ol jaqta aiyna 3,5 myń dollar zeinetaqy qoryna aýdarylady. Bizde ortasha jalaqy – 180 myń teńge. 10 paiyzdy aýdarsaq, 18 myń teńge aýdaryp otyramyz», - dedi ministr.
