BJZQ-ǵa salymshylarynyń alǵashqy 50 myńynyń arnaiy shotyna taiaý kúnderi aqsha aýdarylady. Bul týraly «Otbasy bank» AQ tóraǵasy Lázzat Ibragimova OKQ-da ótken baspasóz máslihatynda málim etti, dep habarlaidy QazAqparat.
«BJZQ portaly men bizdiń banktiń portalyna búginge deiin 80 myńnan astam ótinish tústi. Onyń ishinde 50 519 ótinish iesi týraly aitar bolsaq, qazir olar jeke kabinetine kirse, onda BJZQ ótinishin qaraýǵa qabyldaǵany týraly jańalyqty kóre alady. Qaraý merzimi 3-ten 5 kúnge deiin sozylady. 50 myń salymshy is júzinde birinshi kezeńnen ótti. Olardyń ótinishi arnaiy shotqa aqsha aýdarý satysynda tur. Onyń 8 myńy - keshe saǵat 16:00-ge deiin ózderiniń arnaiy shottaryndaǵy aqshany kórdi. Bul mobildi qosymshada kórinip tur», - dep túsindirdi Lázzat Ibragimova.
Ol sonymen qatar BJZQ-nyń ótinimdi qabyldaǵany týraly statýsty kórgen azamattar óziniń arnaiy shotyndaǵy somany kóre alatynyn, ol úshin Turǵyn úi jinaq banki mobildi qosymshasyna kirýi kerektigin eskertti.
Eske salsaq, 2021 jyly 2 qańtarda QR Prezidenti Qasym-Jomart Toqaev zeinetaqy jinaǵynyń bir bóligin maqsatty paidalanýǵa qatysty zańǵa qol qoidy.
Qazaqstandyqtardyń zeinetaqy jinaqtaryn paidalaný úshin jańartylǵan «jetkiliktilik shegi» jariialandy. Zeinetaqy jinaǵynan alýǵa bolatyn soma BJZQ saitynda avtomatty túrde kórsetiledi.
23 qańtardan Qazaqstanda zeinetaqynyń bir bóligin alýǵa ótinim qabyldaý bastaldy.
