QR Indýstriia jáne infraqurylymdyq damý ministrligi zeinetaqy tólemderin turǵyn úi jaǵdailaryn jaqsartý úshin paidalaný erejelerin jariialady, dep habarlaidy "Ult aqparat".
21 qańtar kúni bekitilgen qujattyń tolyq mátini zan.gov.kz saitynda ornalastyryldy.
Turǵyn úi jaǵdaiyn jaqsartqysy keletinder birjolǵy zeinetaqy tólemin kelesi maqsattarǵa paidalana alady:
- - turǵyn úidi satyp alý-satý, jekeshelendirý, bólip tóleý, aiyrbastaý (aiyrbas jasaý) sharttary boiynsha, turǵyn úi qurylysyna úlestik qatysý týraly zańnamaǵa sáikes turǵyn úi qurylysyna úlestik qatysý týraly sharttar boiynsha;
- - jeke turǵyn úi salý úshin (nysanaly maqsaty bar jer ýchaskesin satyp alýdy qosa alǵanda – jeke turǵyn úi qurylysy nemese jeke qosalqy sharýashylyq) tolyq esep aiyrysý;
- - ipotekalyq turǵyn úi qaryzyn alý úshin bastapqy jarna engizý;
- - turǵyn úi qaryzdaryn ishinara nemese tolyq óteý, ipotekalyq turǵyn úi qaryzyn qaita qarjylandyrý;
- - ipotekalyq turǵyn úi qaryzyn ishinara nemese tolyq óteý, turǵyn úi qurylys jinaqtary júiesi boiynsha jeke turǵyn úi salý (nysanaly maqsaty bar jer ýchaskesin satyp alýdy qosa alǵanda – jeke turǵyn úi qurylysy nemese jeke qosalqy sharýashylyq), turǵyn úi qaryzyn alý;
- - islam bankiniń qarjylandyrýy sheńberinde turǵyn úidi satyp alý, islam bankiniń turǵyn úi satyp alý jónindegi mámileni qarjylandyrýy sheńberinde bereshekti ishinara, tolyq óteý;
- - turǵyn úi qurylysy baǵdarlamalary men daǵdarysqa qarsy baǵdarlamalar sheńberinde berilgen satyp alý quqyǵymen turǵyn úidi uzaq merzimdi jaldaý sharttary boiynsha bereshekti ishinara nemese tolyq óteý.
Aita keteiik, QR azamattary birjolǵy zeinetaqy tólemderin atalǵan maqsattarǵa shekteýsiz paidalana alady.
Sondai-aq birjolǵy zeinetaqy tólemin alýshynyń jubaiy (zaiyby) jáne (nemese) jaqyn týystary atynan ótinish berýshige (-lerge) tiesili birjolǵy zeinetaqy tólemderin atalǵan maqsattarǵa paidalanýǵa ruqsat berilgen. Ol úshin taraptar jeke kabinette birjolǵy zeinetaqy tólemderin berý týraly kelisim jasasady. Kelisim olardyń ETsQ nemese nekeni (erli-zaiyptylyqty) nemese týystyq qatynastardy rastaityn qujattardy qosa bere otyryp, ýákiletti operatordyń ishki qujatynda belgilengen ózge de elektrondyq tásilmen kýálandyrylady.
Málim bolǵandai, jeke menshikte turǵyn úidiń bolýy birjolǵy zeinetaqy
tólemin paidalanýǵa ruqsat berýden bas tartý úshin negiz bola almaidy.
Alaida, zeinetaqy shotyndaǵy qarajat qolma-qol aqsha retinde berilmeidi.
Eskertilip ótkendei, jyljymaityn múlikti óziniń jubaiynan (zaiybynan), jaqyn týystarynan satyp alýǵa bolmaidy.
Budan bólek, Qazaqstan Respýblikasynyń zańnamasynda kózdelgen tártippen sot sheshimi boiynsha jyljymaityn múlikti ótkizý jaǵdailaryn qospaǵanda, birjolǵy zeinetaqy tólemderin paidalana otyryp 5 (bes) jyl ishinde menshikke resimdelgen jyljymaityn múlikti ótkizýge jol berilmeidi.
Eske salsaq, 2 qańtarda QR Prezidenti zeinetaqy jinaǵynyń bir bóligin maqsatty paidalanýǵa qatysty zańǵa qol qoidy.
Qazaqstandyqtar zeinetaqy jinaqtaryn paidalana alý úshin «jetkiliktilik shegi» belgilendi.
Zeinetaqy shotyndaǵy qarajatty jáne turǵyn úi jaǵdaiyn jaqsartý úshin paidalanýǵa bolatyn somany birneshe jolmen tekserýge bolady.
