Elimizde zeinet jasyna jetpei zeinetaqy qoryndaǵy aqshany paidalanýǵa múmkindik bar ma? Zeinet jasyna qamdanǵandardyń shotynda qansha aqsha bolýy tiis? Bul suraqtarǵa Eńbek jáne áleýmettik qorǵaý ministrliginiń Aimaqtyq damý jáne klientter qyzmetiniń basshysy Ashat Muqamedov KTK arnasyna bergen suhbatynda jaýap berdi, dep jazady sputniknews.kz.
Onyń aitýynsha, qazirgi tańda memleket zeinet jasyna jetpei zeinetaqy qoryndaǵy aqshany paidalanýǵa múmkindik beredi.
"Ol úshin azamattar memlekettik saqtandyrý kompaniiasymen zeinet anýiteti shartyn jasasýy kerek. Onda eki talap qoiylady. Er azamattar 55 jasta jáne zeinetaqy qoryndaǵy aqsha 9 million 636 myń teńge bolýy kerek. Al áielder 50 jasta jáne zeinetaqy qoryndaǵy aqsha 13 million 746 myń teńgege jetýi tiis", — dedi Ashat Muqamedov.
Ministrlik ókili erler men áielderdiń qorda jinaityn aqshasynda aiyrmashylyqtyń bolý sebebin túsindirdi.
"Oǵan birinshiden, eń tómengi zeinetaqy mólsheriniń ósýi yqpal etip otyr, 2018 jyldyń 1 qańtarynan bastap onyń mólsheri 33 myń 745 teńgege artty. Ekinshiden, statistika boiynsha áielder erlerge qaraǵanda kóp ómir súretini anyqtalǵan", — deidi Muqamedov.
Ol zeinetaqy qoryndaǵy aqshany úsh jaǵdaida alýǵa bolatynyn atap ótti.
"Birinshi jaǵdai, joǵaryda aitqanymdai, saqtandyrý kompaniiasymen zeinet anýiteti sharty jasalýy kerek, ekinshisi, túpkilikti qonys aýdarǵan jaǵdaida qordaǵy aqshany tolyq alýǵa bolady jáne úshinshi jaǵdai, adamdar qaitys bolǵan jaǵdaida murageri, iaǵni balalary zeinetaqy qoryndaǵy aqshany túgeldei ala alady", — dep túsindirdi ol.
